ސައްހަނޫން ލިޔެކިޔުންތަކެއް ކޯޓަށް ހުށަހަޅައިގެން ދައުލަތުގެ ފައިސާ ހޯދަން އުޅުނު ފިޔަވަޅު ސާބިތުވެގެން އެޓާނީ ޖެނެރަލް އޮފީހުން މައްސަލައެއް ފުލުހަށް ހުށަހަޅައިފިއެވެ.
އޮޑިޓް އޮފީހުން ހާމަކުރި ރިޕޯޓުގައި ހާމަވި ގޮތުގައި، 2008 ވަނަ އަހަރު ހެލްތު މިނިސްޓްރީއަށް މެޑިކަލް އިކުއިޕްމަންޓްސް ފޯރުކޮށްދިނީ ކަމަށް ބުނެ ސެންޓާ އެންޓަޕްރައިސަސް ޕްރައިވެޓް ލިމިޓެޑް އިން ފައިސާއަށް ކޯޓަށް މައްސަލަ ހުށަހެޅުއްވުމުގައި ފޯޖުކޮށްފައިވާ ލިޔެކިޔުންތައް ބޭނުންކޮށްފައިވެއެވެ.
އޮޑިޓް ރިޕޯޓުގައިވާ ގޮތުން، އެ ކުންފުނިން ހުށަހެޅި އެއްބަސްވުމުގައި ރަށްރަށުގެ ސިއްހީ މަރުކަޒުތަކަށް މުދާ ފޯރުކޮށްދިނުމަށް ބުނެފައިވިޔަސް، އެއްވެސް ތަނަކަށް މުދާ ފޯރުކޮށްދިންކަން އެކަށައަޅައި ދޭ ޑެލިވަރީ ނޯޓު ހުށަނާޅައެވެ. އަދި ކޯޓަށް ހުށަހެޅި ސްޓޭޓް ބެންކް އޮފް އިންޑިޔާގެ ބޭންކު ގެރެންޓީއަކީ ސައްހަނޫން ލިޔުމެއްކަން އެ ބޭންކުން ކަށަވަރުކޮށްދީފައިވާކަމަށް ރިޕޯޓުގައި ފާހަގަކޮށްފައިވެއެވެ.
އޭޖީ އޮފީހުގެ އިސް އޮފިޝަލަކު "ވަން" އަށް މައުލޫމާތުދެއްވި ގޮތުގައި މި މައްސަލައާއި ގުޅޭ ހުރިހާ ލިޔުންތަކެއް މިހާރު ފުލުހަށް ފޯރުކޮށްދީފައިވާއިރު، މައްސަލައިގައި ބައިވެރިވާ ފަރާތްތަކަށް ފިޔަވަޅު އަޅައިދިނުމަށް އެދިފައިވާކަން ވިދާޅުވިއެވެ. ސެންޓާއަކީ ދައުލަތުގެ އިދާރާތަކަށް މުދާ ފޯރުކޮށްދިނުމަށްފަހު ފައިސާ ލިބުމުންވެސް، ފައިސާ ނުލިބޭކަމަށް ބުނެ ކޯޓަށް މައްސަލަ ހުށަހެޅުމުގެ މާޒީއެއް އޮތް ކުންފުންޏެއްކަމަށް އޮޑިޓް އޮފީހުން ހާމަކުރިއެވެ.
ކޮމެންޓު ފޮނުވާ