ދިވެހިރާއްޖެއާއި މިޞްރާ ދެމެދު ސިޔާސީ ދާއިރާގައި އެހީތެރިކަން ފޯރުކޮށްދިނުމާ ގުޅޭ އެއްބަސްވުމެއްގައި ސޮއިކޮށްފިއެވެ. ޚާރިޖީ ވަޒީރު ޑރ. ޢަބްދުﷲ ޚަލީލު މިޞްރަށް ކުރައްވަމުންގެންދަވާ ރަސްމީ ދަތުރުފުޅުގައި މި އެއްބަސްވުމުގައި ސޮއިކުރެއްވިއިރު، މިޞްރުގެ ފަރާތުން ސޮއިކުރެއްވީ އެޤައުމުގެ ޚާރިޖީ ވަޒީރު ޑރ. ބަދްރު ޢަބްދެލަތީއެވެ.
ޚާރިޖީ ވުޒާރާއިން ހާމަކުރި ގޮތުގައި، މި އެއްބަސްވުމުގެ ސަބަބުން 2019 ވަނަ އަހަރުން ފެށިގެން ދެޤައުމުގެ ދެމެދު މިދާއިރާއިން ކުރެވެމުން އައި މަސައްކަތް ރަސްމީގޮތުން ކަނޑައެޅިގެން ދިޔައެވެ. ދެޤައުމުގެ ޚާރިޖީ ވަޒީރުން ބައްދަލުކުރައްވައި، ދެޤައުމުގެ ދެމެދު އޮތް ދުވަސްވީ ގުޅުން އިތުރަށް ހަރުދަނާކުރުމާއި، އެކި ދާއިރާތަކުން ގުޅިގެން ތަރައްޤީއަށް މަސައްކަތްކުރުމާއި ގުޅޭ ގޮތުން މަޝްވަރާކުރައްވައިފައިވެއެވެ.
މިދިޔަ ހުކުރު ދުވަހު ފެށި ވަޒީރުގެ މި ދަތުރުފުޅުގައި ފޮރިން މިނިސްޓްރީގެ ސެކްރެޓަރީ ޑރ. ހާލާ ޙަމީދު އަދި އެޑިޝަނަލް ސެކްރެޓަރީ ޚަދީޖާ ނަޖީހާ ވެސް ބައިވެރިވެވަޑައިގަންނަވައެވެ. ޚާރިޖީ ވުޒާރާއިން ބުނީ މިދަތުރުފުޅާއެކު ރާއްޖެއާއި މިޞްރާ ދެމެދު އޮތް ޒަމާންވީ ގުޅުން އިތުރަށް ބަދަހިވެގެންދާނެ ކަމަށެވެ.
ކޮމެންޓު ފޮނުވާ