ނަސްރު ބޯޓު އަޑިއަށްދިޔުން: ރަށަށް ބޭނުންވާ ކާޑާއި ޒަރޫރީ ތަކެތި ރަށުން ހުސްވިޔަނުދީ ލިބޭނޭ އިންތިޒާމު ދަނީ ހަމަޖެއްސަމުން

ހދ. ނޭކުރެންދޫއަށް ނިސްބަތްވާ ނަސްރު ބޯޓު އިއްޔެ މެންދުރު ޅ.އަލިގާގެ ދެކުނުން 3.3 ނޯޓިކަލް މޭލު ސަރަހައްދުގައި އަޑިއަށް ގޮސްފައިވާއިރު، ބޯޓުގައި ހުރި ގިނަ އަދަދެއްގެ މުދާ ވަނީ ކަނޑުވެ ގެއްލިގެން ގޮސްފައެވެ.

މާލެއިން އުތުރަށް ދަތުރުކުރަމުން ދިޔަ މި ބޯޓު އަޑިއަށް ގޮސްފައިވަނީ އިއްޔެ މެންދުރު 13:22 ހާއިރު ކ. ކާށިދޫ އާއި ޅ. އަތޮޅާ ދެމެދުގެ ސަރަހައްދެއްގައެވެ. ބޯޓުގައި ތިބި 5 މީހުން، އެއީ 2 ދިވެހިންނާއި 3 ބިދޭސީން، ސިފައިންގެ އެހީތެރިކަމާއެކު ސަލާމަތް ކުރެވުނެވެ.

ނޭކުރެންދޫގެ ވިޔަފާރިވެރިންނާއި އާންމު ރައްޔިތުން އެރުވި ގިނަ އަދަދެއްގެ މުދާ މި ހާދިސާގައި ގެއްލިގެން ދިޔައިރު، އެ ރަށު ކައުންސިލުން މިއަދު ބުނީ ބޯޓުގެ ވެރިފަރާތަށް ލިބުނު ހިތާމާގައި ބައިވެރިވާ ކަމަށާއި، ރައްޔިތުންނަށް ބޭނުންވާ ކާޑާއި ޒަރޫރީ ތަކެތި ރަށުން ހުސްވިޔަނުދީ ލިބޭނޭ އިންތިޒާމު ހަމަޖެއްސުމަށް ވިޔަފާރިވެރިންނާ ގުޅިގެން މަސައްކަތް ކުރަމުން އަންނަ ކަމަށެވެ.