އެމްޕީއެލްގެ ހުޅުމާލެ ބަނދަރުގައި ބަހައްޓާފައި ހުރި 13 މިލިއަން ސިނގިރޭޓް ވަގަށްނެގި މައްސަލާގައި ހައްޔަރުކުރި ހަތަރު މީހުންގެ ބަންދުގެ މުއްދަތު ކްރިމިނަލް ކޯޓުން ޖަހާއިފިއެވެ. މި މައްސަލާގައި ހައްޔަރުކުރީ ލޮޓަސް ފިހާރަތަކުގެ ވެރިޔާ އަހުމަދު އާރިފް އާއި އެޕޯލޯ ހޯލްޑިންސްގެ ސީއީއޯ މުހައްމަދު ވަހީދު، ކަސްޓަމްސްގެ ކުރީގެ އޮފިސަރު މުއާޒް އަލީ އަދި ކަސްޓަމްސްގެ ސީނިއާ މުވައްޒަފު ޒިވާރު އިސްމާއިލްއެވެ.
ކޯޓުން އާރިފް އާއި ޒިވާރުގެ ބަންދަށް 15 ދުވަސް ޖަހާދީ، މުހައްމަދު ވަހީދުގެ ބަންދަށް 10 ދުވަސް ޖަހާދީފައިވެއެވެ. މުއާޒްގެ ބަންދަށް ޖަހާދިނީ ފަސް ދުވަހެވެ. ފުލުހުން ބުނި ގޮތުގައި މި ހަތަރު މީހުންނަކީ ދެ ކޮންޓެއިނަރުގައި ހުރި ސިނގިރޭޓް ވަގަށްނެގުމުގައި ރާވާ އިސްކޮށް ހަރަކާތްތެރިވި މީހުންނެވެ. މި މައްސަލާގައި 12 މީހަކު ފުރުން މަނާކޮށްފައިވާކަމަށްވެސް ފުލުހުން ބުނެފައިވެއެވެ.
މި ހަތަރު މީހުންގެ ތެރެއިން މުއާޒަކީ ކަސްޓަމްސްގައި މަސައްކަތް ކުރި ދުވަސްވަރު 430 ސިނގިރޭޓް ކޭސް އެތެރެކުރުމުގައި ރިޝްވަތަށް އެދުނު ކަމުގެ ތުހުމަތުގައި އޭސީސީން ޕީޖީ އޮފީހަށް މައްސަލަ ފޮނުވާފައިވާ މީހެކެވެ. އޭނާ މިހާރުވެސް ހުރީ މިފްކޯގެ ޖެނެރަލް މެނޭޖަރު އިންޖިނިއަރިން ޕްރޮޖެކްޓްސްގެ މަގާމުގައެވެ.
އެމްޕީއެލްއިން ބުނީ މި ވައްކަމުގައި އެ ކުންފުނީގެ 6 މުވައްޒަފަކު ސަސްޕެންޑް ކޮށްފައިވާ ކަމަށެވެ. ސައުދީ އަރަބިއްޔާގެ ބިންލާދިން ގްރޫޕުގެ ނަމުގައި ރާއްޖެއަށް ވަގަށް އެތެރެކުރި 13.6 މިލިއަން ސިނގިރޭޓު ހުރި ދެ ކޮންޓެއިނަރު މިދިޔަ އަހަރުގެ އޭޕްރީލްމަހުން ފެށިގެން އެމްޕީއެލް ހުޅުމާލޭގެ ބަނދަރުގައި ބަހައްޓައި ހުރި ނަމަވެސް އެ ސިނގިރޭޓް ނެތިގެން ދިޔަކަން ކަސްޓަމްސްއަށް އެނގުނީ މި މަހުގެ 8 ވަނަ ދުވަހުގެ ރޭގައެވެ.
ކޮމެންޓު ފޮނުވާ