ށ. އަތޮޅަށް އިންވެސްޓަރުންގެ ޝައުގުވެރިކަން ކުޑަވަނީ ދަތުރުކުރުން އުނދަގޫ ވުމުން ކަމަށާއި އަލަށް އަޅާ އެއާޕޯޓްތަކުން އެ މައްސަލަ ހައްލުވެ، އެ އަތޮޅަށް އިންވެސްޓްމަންޓް އަންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ކޮމަންޑޫގައި ރޭ ބޭއްވި ރައްޔިތުންގެ ޖަލްސާގައި ރައީސް ވިދާޅުވީ، 14 ރަށް އޮންނަ ށ. އަތޮޅުގައި މިހާރު ހުރީ ފުނަދޫގެ އެއާޕޯޓް އެކަނި ކަމަށާއި އެހެންކަމުން ޓޫރިޒަމް ތަރައްގީވާން އުނދަގޫވާ ކަމަށެވެ. އެމަނިކުފާނު ވިދާޅުވީ އެއާޕޯޓްތައް ފީސިބަލް ކުރުމަށް ފަތުރުވެރިކަން ތަރައްގީ ކުރަންޖެހޭ ކަމަށާއި ރިސޯޓްތައް އަތޮޅަށް ގެނައުމަށް ސަރުކާރުން ލުއިތައް ދީފައިވާ ކަމަށެވެ.
"އިންފްރާސްޓްރަކްޗާ މަޝްރޫއުތައް އެޅުމުން އިންވެސްޓަރުން ޝައުގުވެރިވާނެ. އަތޮޅު އޮންނަނީ ދަތުރުފަތުރު ކުރަން އުނދަގޫގޮތަކަށް އެހެންކަމުން އިންވެސްޓަރުންގެ ޝައުގުވެރިކަން ކުޑަ،" ރައީސް ވިދާޅުވިއެވެ.
ރައީސް ވިދާޅުވީ އެއާޕޯޓްތަކުގެ ސަބަބުން އަތޮޅުގެ ޒުވާނުންނަށް ރަށުގެ ކައިރީގައި ވަޒީފާގެ ފުރުސަތު ލިބޭނެ ކަމަށެވެ. ރިޔާސީ އިންތިހާބުގެ ވައުދުގައި ށ. ބިލެތްފަހި، ކޮމަންޑޫ އަދި މިލަންދޫގައި އެއާޕޯޓް ހަދައިދިނުމަށް ރައީސް ވަނީ ވައުދުވެވަޑައިގެންފައެވެ. ފުށިފަރާއި ގޮނާފަޅު ފަޅުން ތިން ޕްލޮޓް އަދި ކުޑަޅައިމެންދޫ ޓޫރިޒަމަށް ހުޅުވާލުމުގެ މަސައްކަތް ކުރިއަށްދާ ކަމަށް ވެސް ރައީސް ވިދާޅުވިއެވެ.
ކޮމެންޓު ފޮނުވާ