މިދިޔަ ހަފުތާގެ ހުކުރު ދުވަހު މާލޭގައި ބޭއްވި އެމްޑީޕީގެ މުޒާހަރާ ރޫޅައިލަން ފުލުހުން ސޮނިކް ވެޕަން ބޭނުންކޮށްފައިވާތީ އުފެދިފައިވާ ކަންބޮޑުވުންތަކާ ގުޅިގެން، ކުރިއަށް އޮތް ތަނުގައި އެފަދަ ހަތިޔާރު ބޭނުން ނުކުރުމަށް 27 ޖަމިއްޔާއަކުން ގޮވާލައިފި އެވެ.
އޭޝިއަން ފޯރަމް ފޯ ހިއުމަން ރައިޓްސް އެންޑް ޑިވެލޮޕްމަންޓާއި 26 ޖަމިއްޔާއެއް ގުޅިގެން ނެރުނު ބަޔާނުގައި ބުނީ، އޮކްޓޯބަރު 3 ވަނަ ދުވަހުގެ "ލޫޓްވައިފި ލޫޓްވައިފި" މުޒާހަރާ ރޫޅާލުމަށް ހާލަތާ ނުބައްދަލު ބާރުގެ ބޭނުންކޮށްފައިވާ ކަމަށެވެ. މުޒާހަރާ ފެށުމުގެ ކުރިން ވެސް އަސްކަރީ އުޅަނދުތައް މަގުތަކަށް ނެރެ ރައްޔިތުންނަށް ބިރު ދެއްކުމުގެ އަމަލުތައް ހިންގާފައިވާ ކަމަށް ވެސް ބަޔާނުގައި ފާހަގަކޮށްފައިވެ އެވެ.
މާލެ ފަދަ ތޮއްޖެހިފައި އޮތް ސިޓީއެއްގައި ލޯންގް ރޭންޖް އެކޯސްޓިކް ޑިވައިސް (އެލްރެޑް) ބޭނުންކުރުމަކީ އާންމު ސިއްހަތާއި ސަލާމަތަށް އޮތް ބޮޑު ނުރައްކަލެއް ކަމަށް ޖަމިއްޔާތަކުން ބުންޏެވެ. ކައިރިން އެ ވެޕަން ބޭނުންކުރާއިރު ބައިވެރިންނަށް ލިބޭ ގެއްލުމުގެ އިތުރުން، ކައިރީގައި ދިރިއުޅޭ ކުޑަކުދިންނާއި އުމުރުން ދުވަސްވީ މީހުންނާއި އާއިލާތަކަށް އަޑުއިވުމާއި ނިއުރޮލޮޖިކަލް ގެއްލުންތައް ލިބުމުގެ ނުރައްކާ އޮންނަ ކަމަށް ވެސް ބަޔާނުގައި ބުނެފައިވެ އެވެ.
ފުލުހުން އަޅަމުން އަންނަ އެފަދަ ފިޔަވަޅުތަކަކީ ރާއްޖޭގެ ފުލުހުންގެ ހިދުމަތް ވަރަށް ބޮޑަށް އަސްކަރީވަމުން އަންނަކަން ދައްކައިދޭ ކަމެއް ކަމަށާއި، ޤާނޫނުއަސާސީން ކަށަވަރުކޮށްދީފައިވާ ސުލްހަވެރިކަމާއެކު އެއްވެ އުޅުމުގެ މިނިވަންކަމާއި ޚިޔާލު ފާޅުކުރުމުގެ މިނިވަންކަމުގެ ހައްޤުތަކަށް އަރައިގަތުމެއް ކަމަށް ވެސް ބަޔާނުގައި ފާހަގަކުރި އެވެ. އެމްޑީޕީން ބުނީ "ސޮނިކް ވެޕަން" އަކީ މީގެ ކުރިން ފުލުހުން ބޭނުންކުރަމުން އައި އެއްޗެއް ނޫން ކަމަށާއި އެ ބޭނުންކޮށްފައިވަނީ އުސޫލާ ހިލާފަށް ކަމަށެވެ.
ކޮމެންޓު ފޮނުވާ