ނަފްސާނީ ދުޅަހެޔޮކަމަކީ އިންސާނީ އެންމެ އަސާސީ ހައްޤުތަކުގެ ތެރޭގައި ހިމެނޭ ކަމެއް ކަމަށާއި، އެ ހައްޤު ކަށަވަރުކޮށްދިނުމަށް ސަރުކާރުން އަބަދުވެސް މަސައްކަތްކުރައްވާނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ މުނާސަބަތުގައި މިއަދު ކުރެއްވި އެކްސް ޕޯސްޓެއްގައެވެ.
އެކްސްގައި ކުރެއްވި ޕޯސްޓެއްގައި ރައީސް ވަނީ މިއަހަރުގެ "އިންސާނީ ކާރިސީ ހާލަތްތަކުގައި ނަފްސާނީ ދުޅަހެޔޮކަމުގެ މައްޗަށް" މި ޝިއާރުގައި ދުނިޔޭގެ ފެންވަރުގައި ފިޔަވަޅު އަޅަން ގޮވާލައްވާފައެވެ. ރައީސް ޚާއްޞަގޮތެއްގައި ފާހަގަކުރެއްވީ ފަލަސްޠީނުގެ ރައްޔިތުންނަށް ނަފްސާނީ ދުޅަހެޔޮކަމަށް ބޭނުންވާ އެހީތެރިކަން ވަރަށް ބޮޑަށް ބޭނުންވެފައިވާކަމަށާއި، ހުރިހާ ފަރާތްތަކަކުންވެސް އެކަމަށް އިޖާބަދޭންޖެހޭކަމަށެވެ.
ރައީސް ވިދާޅުވީ ނަފްސާނީ ދުޅަހެޔޮކަމަށް ސަރުކާރުން އިސްކަންދެއްވާކަމަށާއި، އެ ދާއިރާ ހަރުދަނާކުރުމަށް ގިނަ މަސައްކަތްތަކެއް ކުރައްވަމުން އަންނަކަމަށެވެ. އެގޮތުން މޫސުމީ، ޞިއްޙީ އަދި އިންސާނީ ކާރިސާ ފަދަ ކަންކަމުގައި ކުރިމަތިވާ ނަފްސާނީ ކަންކަމަށް އެހީތެރިވެވޭނޭހެން ކަންކަން ބައްޓަންކުރަމުންދާކަން ރައީސް ފާހަގަކުރެއްވިއެވެ. ކޮންމެ އަހަރެއްގެވެސް އޮކްޓޯބަރުމަހުގެ 10 ވަނަ ދުވަހަކީ ދުނިޔޭގެ ނަފްސާނީ ދުޅަހެޔޮކަމުގެ ދުވަހެވެ.
ކޮމެންޓު ފޮނުވާ