ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި މަހުގެ ފަހުކޮޅު ރާއްޖޭގެ އެންމެ ދެކުނު ސިޓީ އައްޑު އަށް ވަޑައިގަންނަވަން ހަމަޖެހިފައިވާ ކަމަށް މައުލޫމާތު ލިބިއްޖެ އެވެ. ނަމަވެސް ރައީސްގެ މި ދަތުރާ ގުޅޭ އިތުރު ތަފްސީލެއް ސަރުކާރުގެ ފަރާތުން އަދި ރަސްމީކޮށް ހާމައެއް ނުކުރެ އެވެ.
ރައީސް މުއިއްޒު މި ފަހުން އަތޮޅުތެރޭގެ ރަށްރަށަށް ރާވާފައިވާ ދަތުރުތަކުގެ ސިލްސިލާ ދަނީ ކުރިއަށް ގެންދަވަމުންނެވެ. ސަރުކާރުން ބުނަމުންދަނީ މި ދަތުރުތަކުގެ މައިގަނޑު މަގްސަދަކީ ރައްޔިތުންނާ ގާތަށް ވަޑައިގެން އެ މީހުންގެ ކަންބޮޑުވުންތައް ހައްލުކޮށްދިނުމާއި އެ މީހުންނަށް ބޭނުންވާ ކަންކަން އޮޅުން ފިލުއްވުން ކަމަށެވެ.
އައްޑު އަށް ރައީސް ވަޑައިގަންނަވާ ހިނދު ސިޓީގެ އިދާރީ ހިންގުމަށް މިހާރު އޮންނަ އައްޑޫ ސިޓީ ކައުންސިލް އުވާލައި، އެ ސިޓީގެ އެކި ހިސާބުތަކަށް ވަކިވަކި ކައުންސިލްތަކެއް ގާއިމުކުރަން ފެނޭތޯ ބެލުމަށް ރައްޔިތުންގެ ނުފެންނަ ވޯޓަކަށް ދިއުމަށް ސަރުކާރުން ދާދި ފަހުން ނިންމާފައިވެ އެވެ. އެއާއެކު އައްޑޫގައި ތަރައްގީގެ ބައެއް މަޝްރޫއުތައް އިއުލާން ކުރަމުން އަންނަ ކަމަށް ވެސް ވެ އެވެ. އެގޮތުން ހަންކެޑެ ރިއަލް އެސްޓޭޓް ޓޫރިޒަމަށް ތަރައްގީ ކުރުމުގެ މަސައްކަތް މި އަހަރުގެ ތެރޭގައި ފެށުމަށް ނިންމާފައިވާއިރު، ދޮންހެރެ ހަލާލު ޓޫރިޒަމަށް ތަރައްގީ ކުރުމަށް ބީލަމަށް ވެސް ހުޅުވާލާފައިވެ އެވެ. އެއާއެކު ފަސް އަހަރަށް ވުރެ ގިނަ ދުވަސްވަންދެން ބަންދުކޮށްފައި އޮންނަ ޝަންގްރިއްލާ ވިލިގިލި ރިސޯޓް އެންޑް ސްޕާ އަލުން ހުޅުވުން އަންނަ ޑިސެމްބަރު މަހު ނިމުމުގެ ކުރިން ފެށުމަށް ސަރުކާރުން އިއުލާން ކޮށްފައިވެ އެވެ.
ރިޔާސީ ކެމްޕޭނުގެ ތެރޭގައި ރައީސް މުއިއްޒު އައްޑޫގެ ރައްޔިތުންނަށް ދެއްވި އެންމެ ބޮޑު ވައުދަކީ ހުޅުމީދު އާއި ހިތަދުއާ ދެމެދު ބްރިޖެއް އެޅުން ކަމަށްވާއިރު، މި މަޝްރޫއުގެ އަމަލީ މަސައްކަތް އަދި ފެށިފައި ނުވާކަން ފާހަގަ ކުރެވެއެވެ. ރައީސް މުއިއްޒު އެންމެ ފަހުން އައްޑު އަށް ވަޑައިގެންނެވީ މިދިޔަ އަހަރުގެ އެޕްރީލް މަހުގެ ކުރީކޮޅު ރައްޔިތުންގެ މަޖިލީހުގެ އިންތިހާބުގެ ކެމްޕޭން ހަރަކާތްތަކުގައި ބައިވެރިވެވަޑައިގަންނަވަމުންނެވެ.
ކޮމެންޓު ފޮނުވާ