ރޭ މާލޭގައި އެމްޑީޕީން ކުރިއަށްގެންދިޔަ މުޒާހަރާއާ ގުޅިގެން ދިވެހި ފުލުހުންގެ ޚިދުމަތުން ކުރި މަސައްކަތަށް އާންމު ރައްޔިތުންގެ ފަރާތުން ލިބުނު އެއްބާރުލުމަށް އިހުލާސްތެރިކަމާއެކު ޝުކުރު އަދާކޮށްފައިވާ ކަމަށް ފުލުހުން ބުނެފިއެވެ.
އާޓިފިޝަލް ބީޗް ސަރަހައްދުން ފެށި މުޒާހަރާގައި އެތައް ހާސް ބަޔަކު ބައިވެރިވި އެވެ. އެ ސަރަހައްދުގައި އެމްޑީޕީގެ އިސް ބޭފުޅުން ވާހަކަ ދެއްކެވުމަށްފަހު، މުޒާހަރާގެ ބައިވެރިން މަގުމަތީގައި އަޑުއުފުލުމަށް މަޖީދީމަގަށް ނިކުންނަން ގޮވާލި އެވެ. އޭރު ފުލުހުން ވަނީ ބައެއް ސަރަހައްދުތައް ބަންދުކޮށް، ވަރަށް ގިނަ އަދަދަކަށް ޝީލްޑާއެކު މައިދާނަށް ނުކުމެފަ އެވެ.
މަޖީދީމަގުގައި މުޒާހަރާގެ ބައިވެރިން ކުރިއަށްދިއުމަށް ފުރުސަތު ނުލިބުމުން ހަމަނުޖެހުންތަކެއް ހިނގިއެވެ. ބައެއް ބައިވެރިން ފުލުހުން ބަހައްޓާފައިވާ ބެރިކޭޑްތައް އުކާލިއެވެ. ފުލުހުންގެ ޝީލްޑްތަކަށް ވަނީ ތަޅާފައެވެ. މުޒާހަރާގެ ބައިވެރިން ހުއްޓުވުމަށް ފުލުހުން ކަރުނަ ގޭސް ޖެހި އިރު، ބައިވެރިން ވަނީ ފުލުހުންނާ ދިމާއަށް އެކި އެއްޗެހި އުކާފަ އެވެ.
ދެތިން ގަޑިއިރު ދެމިގެންދިޔަ މުޒާހަރާގައި އެމްޑީޕީގެ ލީޑާޝިޕްގެ ބޭފުޅުން މަގުމަތީ އިށީންދެ ތިބެ އަޑުއުފުލުމުގެ ހަރަކާތްތަކުގައި ބައިވެރިވި އެވެ. ދުއާކުރުމަށްފަހު، އެ ޕާޓީން މުޒާހަރާ ރަސްމީކޮށް ނިންމާލިކަން އެއަށްފަހު އިއުލާނު ކޮށްފައި އެވެ. ލީޑާޝިޕުން ބުނީ ރޭގެ މުޒާހަރާއަކީ "ވޯމްއަޕް" އެއްކަމަށެވެ.
ކޮމެންޓު ފޮނުވާ