ފެނަކައިގެ ފައިސާގައި ނުޖެހެން: ސާލިހު

ވެރިކަމުގައި ހުންނެވިއިރު ޖަވާބުދާރީ ނުވެވޭނެ އެއްވެސް ކަމެއް ކުރައްވާފައި ނުވާނެ ކަމަށާއި، ފެނަކަ ކޯޕަރޭޝަންގެ އެއްވެސް ފައިސާއެއްގައި ޖެހިވަޑައިނުގަންނަވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) މިއަދު ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" ޕްރޮގްރާމުގައި ވާހަކަދައްކަވަމުން އިބޫ ވިދާޅުވީ، ދައުލަތުގެ ފައިސާގެ ތެރެއިން ލޯ ލާރިއެއްގައި ވެސް ޖެހިވަޑައިނުގަންނަވާ ކަމަށެވެ. "ފުރަތަމަ ކަމަކަށް ވެސް އަޅުގަނޑަށް ޖަވާބުދާރީ ނުވެވޭ ކަމެއް އަޅުގަނޑު ކޮށްފައެއް ނޯންނާނެ ވެރިކަމުގައި ހުރެ. ކޮށްފައި ހުރި ކޮންމެ ކަމެއް، އަޅާފައި ހުރި ކޮންމެ ފިޔަވަޅަކަށް އަޅުގަނޑަށް ޖަވާބުދާރީވާން ޖެހުނު ކޮންމެ ތަނެއްގައި އިރާދަކުރެއްވިއްޔާ ވެވޭނެ،" އިބޫ ވިދާޅުވި އެވެ.

އޮޑިޓަ ޖެނެރަލްގެ އޮފީހުން މިދިޔަ ބުރާސްފަތި ދުވަހުގެ ރޭ ނެރުނު ރިޕޯޓުގައި ވަނީ، 2021 އިން 2023 އަށް ފެނަކަ ކޯޕަރޭޝަންގައި ކޮރަޕްޝަންގެ ގިނަ މައްސަލަތަކެއް ފެންމަތިވެފައިވާ ކަމަށެވެ. މި ރިޕޯޓުގައި ފާހަގަކޮށްފައިވާ ކަންކަމުގެ ތެރޭގައި ބިޑަށް ނުލައި 1.3 ބިލިއަން ރުފިޔާގެ ޕްރޮޖެކްޓުތައް ހަވާލުކުރުމާއި، ކުންފުނީގެ ކުރީގެ އެމްޑީ އަހުމަދު ސައީދުގެ އާއިލާގެ ކުންފުނިތަކަށް 31 މިލިއަން ރުފިޔާގެ މަސައްކަތް ހަވާލުކޮށްފައިވުން ހިމެނެ އެވެ.

މީގެ އިތުރުން މުވައްޒަފުންނަށް ޕެޓީ ކޭޝްގެ ގޮތުގައި 26 މިލިއަން ރުފިޔާ ދޫކޮށްފައިވުމާއި، އޮފީސް އިމާރާތެއް އެޅުމަށް މާކެޓު އަގަށްވުރެ 767 މިލިއަން ރުފިޔާ އިތުރަށް ހޭދަކުރުމާއި، ދަތުރުފަތުރަށް މާކެޓު ރޭޓަށްވުރެ 48 މިލިއަން ރުފިޔާ އިތުރަށް ހޭދަކޮށްފައިވާ ކަމަށް ރިޕޯޓުގައި ބުނެފައިވެ އެވެ.

އިބޫ ވިދާޅުވީ، މި ރިޕޯޓަކީ ކުއްލިއަކަށް ދަންވަރުގަޑީގައި ނެރުނު ސިޔާސީ ރިޕޯޓެއް ކަމަށެވެ. އަދި ފެނަކައިގެ ބައެއް މައްސަލަތައް އެމަނިކުފާނުގެ ވެރިކަމުގައި ވެސް އޭސީސީން ބަލަމުން ދިޔަ ކަމަށާއި، ގިނަ މައްސަލަތައް އޭރު ފައިލްކޮށް، ބައެއް ކަންކަން އިސްލާހު ކޮށްފައިވާނެ ކަމަށް އިބޫ ފާހަގަކުރެއްވި އެވެ.

ފެނަކައިގެ ކުރީގެ އެމްޑީ އަހުމަދު ސައީދަށް ކޮރަޕްޝަންގެ މައްސަލައެއްގައި މިދިޔަ އާދިއްތަ ދުވަހު އިއްވި ހަތަރު އަހަރުގެ ޖަލު ހުކުމަކީ ސިޔާސީ ހުކުމެއް ކަމަށް އިބޫ ވިދާޅުވި އެވެ. އެގޮތަށް ވިދާޅުވި ސަބަބަކީ، ރައީސް އަބްދުﷲ ޔާމީންގެ ވެރިކަމުގައި ފެނަކައިގެ މެނޭޖިން ޑިރެކްޓަރަކަށް ހުންނެވި މުހައްމަދު ނިމާލަށް ތުހުމަތުކުރެވޭ މައްސަލަ 2022 ވަނަ އަހަރު ކޯޓަށް ފޮނުވިނަމަވެސް، އެ މައްސަލަ އަދިވެސް ނުބެލޭތީ ކަމަށް އިބޫ ވިދާޅުވި އެވެ.

"ފެނަކައިގެ ތި ވިދާޅުވާ ކަންތައްތަކުގެ ތެރެއިން އެއްވެސް ކަހަލަ ބެނެފިޓެއް، ފައިދާއެއް، ފައިސާއެއް އަޅުގަނޑާ ހިސާބަށް އައިސްފައެއް ނޯންނާނެ،" އިބޫ ވިދާޅުވި އެވެ.