"އޯޕަން ވިސާ"ގެ ނަމުގައި ރާއްޖޭގައި ގާނޫނާ ހިލާފަށް ވިޔަފާރި ހަރަކާތްތަކުގައި އުޅޭ ބިދޭސީން ޑީޕޯޓުކުރާނެ ކަމުގެ އިންޒާރު މޯލްޑިވްސް އިމިގްރޭޝަނުން ދީފިއެވެ.
ހޯމަ ދުވަހު އިމިގްރޭޝަނުން ނެރުނު އިއުލާނެއްގައި ފާހަގަކޮށްފައިވަނީ، "އޯޕަން ވިސާ"ގެ ނަމުގައި ރާއްޖޭގައި ބިދޭސީން ހަރަކާތްތެރިވަމުންދަނީ ބައެއް ދިވެހި ރައްޔިތުންގެ އެހީތެރިކަމާ އެކުގައި ކަމަށެވެ. މިކަން އެ އިދާރާއަށް ފާހަގަވެފައިވާ ކަމަށް އިމިގްރޭޝަނުން ބުނެއެވެ.
އިމިގްރޭޝަނުން ބުނި ގޮތުގައި، އޯޕަން ވިސާގެ ނަމުގައި ރާއްޖެ އެތެރެވެ، ހުއްދަ ދޫކޮށްފައިވާ މަސައްކަތް ނޫން އެހެން މަސައްކަތްތައް ކުރަމުންދާ ބިދޭސީން ޑީޕޯޓުކުރާނެއެވެ. މިފަދަ ގޮތަކަށް ރާއްޖޭގައި ބިދޭސީން މަސައްކަތްކުރުމަކީ ގާނޫނީ ގޮތުން ހުއްދަ ކަމެއް ނޫން ކަމަށް އެ އިދާރާއިން ވަނީ ސާފުކޮށްދީފައެވެ.
ރާއްޖެއަށް ބިދޭސީން އެކި މަސައްކަތްތަކަށް ގެންނަ ދިވެހި ފަރާތްތަކުން، އެ ބިދޭސީން ގެނައި މަސައްކަތް ނޫން އެހެން މަސައްކަތްތައް ކުރުވުމަށް ނުފޮނުވުމަށް އިމިގްރޭޝަނުން އިލްތިމާސްކޮށްފައިވެއެވެ.
އިމިގްރޭޝަނުން ފާހަގަކުރި ގޮތުގައި، މިފަދަ ބިދޭސީންގެ އަތުގައި މުއްދަތު ހަމަނުވާ ވިސާއެއް އޮތް ނަމަވެސް، ދޫކޮށްފައިވާ ވިސާ ނުވަތަ ހުއްދައިގެ ބޭރުން އެހެން ތަނެއްގައި މަސައްކަތްކުރަމުންދެއެވެ. ނުވަތަ ހުއްދަ ދޫކޮށްފައިވާ މަސައްކަތް ނޫން އެހެން މަސައްކަތެއް ކުރަމުންގެންދާ ކަމަށް އެ އިދާރާއިން ބުނެފައިވެއެވެ.
"އޯޕަން ވިސާގައި މަސައްކަތްކުރާ ބިދޭސީންގެ އަދަދު ދަނީ އިތުރުވަމުން. އެމީހުންގެ ވަޒީފާ ދީފައިވާ ތަނުގެ އިތުރުން އެހެން ތަންތަނުގައި މަސައްކަތްކޮށްގެން އާމްދަނީ ހޯދުމާއި، އަމިއްލަ މަސައްކަތާއި ވިޔަފާރިކޮށްގެން ބޮޑެތި މާލީ މަންފާތައް ހޯދާ،" އިމިގްރޭޝަނުން ވިދާޅުވިއެވެ.
އިމިގްރޭޝަނުން ސާފުކޮށްދިން ގޮތުގައި، ބިދޭސީންނަށް މަސައްކަތްކުރުމުގެ ހުއްދަ ލިބިފައިވަނީ ހަމައެކަނި އެމީހުންނަށް ވިސާ ދޫކޮށްފައިވާ ތަނުގައި، ހުއްދަ ދޫކޮށްފައިވާ މަސައްކަތް ކުރުމަށެވެ. އެހެން ތަންތަނުގައި ނުވަތަ އެހެން މަސައްކަތްތައް ކުރުމަކީ ގާނޫނާ ހިލާފު ކަމެކެވެ.
މިކަމަށް ސަމާލުވުމަށާއި، ވަޒީފާދޭ ފަރާތްތަކުން އެމީހުންގެ މުވައްޒަފުން އެހެން ތަންތަނަށް މަސައްކަތްކުރުމަށް ނުފޮނުވުމަށް އިމިގްރޭޝަނުން ވަނީ އިލްތިމާސްކޮށްފައެވެ. މިގޮތަށް އަމަލުނުކުރާ ދިވެހިންނަށް ގާނޫނުގެ ދަށުން ފިޔަވަޅު އެޅުމާއެކު، އެ ބިދޭސީން އަނބުރާ އެމީހުންގެ ގައުމަށް ފޮނުވާލާނެ ކަމަށްވެސް އިމިގްރޭޝަނުން އިންޒާރު ދީފައިވެއެވެ.
މީގެ އިތުރުން، ގަވާއިދާ ހިލާފަށް ރާއްޖޭގައި ބިދޭސީން ގެންގުޅޭ ދިވެހިންނާއި، ބިދޭސީންގެ ފީ ނުދައްކާ ދިވެހި ފަރާތްތަކަށް ސަރުކާރުން ބޮޑެތި ފިޔަވަޅުތައް އަޅަމުންދާ ކަމަށާއި، އެކްސްޕެޓް ސިސްޓަމް މެދުވެރިކޮށް ދެމުންދާ ހިދުމަތްތަކުން ސަސްޕެންޑުކުރަމުންދާ ކަމަށްވެސް އިމިގްރޭޝަނުން ބުނެފައިވެއެވެ.
ރާއްޖެއަށް ބިދޭސީން ގެނެސް، އެމީހުންނާމެދު އިހުމާލުވާ ދިވެހި ފަރާތްތައް ބޮޑެތި އަދަދުތަކުން ޖޫރިމަނާކޮށް، ފިޔަވަޅު އެޅުމުގެ މަސައްކަތްވެސް ކުރިއަށްދާ ކަމަށް އިމިގްރޭޝަނުން މަޢުލޫމާތު ދީފައިވެއެވެ.
ކޮމެންޓު ފޮނުވާ