ނޭޕާލްގައި ކުރިޔަށްދިޔަ ޖެންޒީ މުޒާހަރާތަކުގެ މަޝްހޫރު ލީޑަރު ސޫދަން ގުރުން ވަނީ އަންނަ މާޗުމަހު ބޭއްވުމަށް ހަމަޖެހިފައިވާ ނޭޕާލްގެ އާންމު އިންތިހާބުގައި ބައިވެރިވުމަށް ނިންމައި، ސިޔާސީ ހަރަކާތެއް ފެށުމުގެ އިއުލާން ކޮށްފައެވެ.
36 އަހަރުގެ ސޫދަން ގުރުން އަލްޖަޒީރާ އަށް ދިން އިންޓަވިއުއެއްގައި ހާމަކޮށްފައިވާ ގޮތުގައި "ފައިޓް ޓިލް ދަ އެންޑް" ގެ ނަމުގައި އޭނާ ދިގުލައިގެން ގެންދިޔަ ކެމްޕެއިން މެދުވެރިކޮށް އިންތިހާބުގައި ވާދަކުރުމަށް ތައްޔާރުވަމުންދާ ކަމަށެވެ. އެހެންނަމަވެސް އޭނާ ވާދަކުރާނީ މިނިވަން ކެންޑިޑޭޓެއްގެ ގޮތުގައި ކަމަށާއި، އެއްވެސް ސިޔާސީ ޕާޓީއެއްގެ ދަށުން ނޫންކަމަށް އޭނާ ވަނީ ސާފުކޮށްފައެވެ.
ނޭޕާލްގެ މިހާރުގެ ސިޔާސީ ނިޒާމަށް ކުރާ ފާޑުކިޔުންތަކުގައި ސޫދަން ބުނެފައިވަނީ، ސިޔާސީ ޕާޓީތަކުން ގައުމު ބައިބައިކޮށް، ކޮރަޕްޝަން މެދުވެރިކޮށް ގައުމުގެ ތަރައްގީ ހުއްޓުވާލާފައިވާ ކަމަށެވެ. "ސިޔާސީ ފަރާތްތަކުން މިހާރުވެސް މިގޮތް ދެމެހެއްޓުމަށް މަސައްކަތްކުރާނަމަ، އެމީހުންނަށް ލިބޭނެ ނަތީޖާ ރަނގަޅަށް އެނގޭނެ. މިހާރު ވަގުތަކީ އާންމު ރައްޔިތުންގެ އަޑު އިވޭނެ ވަގުތު،" ސޫދަން ވިދާޅުވިއެވެ.
އިންތިހާބުގައި ކާމިޔާބު ހޯދައިގެން ނޭޕާލް ރަނގަޅު މަގަކަށް އަޅުވައި، ގައުމުގެ ކުރިމަގު އުޖާލާކުރުމަށް މަސައްކަތްކުރާނެ ކަމުގެ ވައުދު ސޫދަން ވަނީ ވެފައެވެ. އޭނާގެ މި ނިންމުމާއެކު ނޭޕާލްގެ ސިޔާސީ މައިދާނަށް އައު ބަދަލެއް އަންނާނެ ކަމަށް ސިޔާސީ ތަޖުރިބާކާރުން ލަފާކުރެއެވެ.
ކޮމެންޓު ފޮނުވާ