ފެނަކަ ކޯޕަރޭޝަނުގެ ދަރަނި 2023 ވަނަ އަހަރު ނިމުނުއިރު 379 ޕަސެންޓް އިތުރުވެފައިވަނީ ކުންފުންޏަށް ލިބުނު އާމްދަނީއާއި ޓެރިފް ލޮސްގެ ގޮތުގައި ދައުލަތުން ދިން ފައިސާއިން ފޫނުބެއްދިގެން ނޫންކަމަށް އޮޑިޓަރ ޖެނެރަލްގެ އޮފީހުން ވަނީ ހާމަކޮށްފައެވެ. މި ދަރަނި އިތުރުވެފައިވަނީ އެމްޑީޕީ ސަރުކާރުގެ ފަސް އަހަރުގެ ތެރޭގައެވެ.
އޮޑިޓަރ ޖެނެރަލް ހުސައިން ނިޔާޒީ އާންމުކުރެއްވި އޮޑިޓް ރިޕޯޓުން ދައްކާގޮތުން، ފެނަކައިގެ މާލީ ހާލަތު މިހާ ދަށްވެފައިވަނީ މުދަލާއި ހިދުމަތް ހޯދުމުގައި ކޮރަޕްޝަނަށް މަގުފަހިވާ ގޮތަށް ކޮށްފައިވާ ގިނަ މުއާމަލާތްތަކެއްގެ ސަބަބުންނެވެ. މީގެ އިތުރުން ކުންފުނީގެ މާލީ ހާލަތާ ނުބައްދަލު، އެ ވަގުތަށް މުހިންމު ނޫން ބޮޑެތި ހަރަދުތައް ކޮށްފައިވާކަން ވެސް ރިޕޯޓުގައި ފާހަގަކުރެއެވެ.
ފެނަކަ ކޯޕަރޭޝަނުގެ މާލީ ހާލަތު 2019 ވަނަ އަހަރުން ފެށިގެން އަހަރުން އަހަރަށް ގޯސްވަމުން އައިސްފައިވާއިރު، ކުންފުނިން އެކި ފަރާތްތަކަށް ދައްކަންޖެހޭ ފައިސާ ނުދެއްކި ދަރަނި އިތުރުވެގެން ގޮސްފައިވާކަން ރިޕޯޓުން އެނގެއެވެ. މި ހާލަތު މެދުވެރިވީ ކުންފުނީގެ މެނޭޖްމަންޓާއި މާލީ ކަންކަން ބެލެހެއްޓުމުގެ ޒިންމާ އަދާކުރަންޖެހޭ ފަރާތްތަކުން ރޭވުންތެރިކަމާއި ޒިންމާދާރުކަމެއް ނެތި، ކުންފުނީގެ މާލީ ހާލަތާއި ލިބޭ އާމްދަނީއާ ނުބައްދަލު ބޮޑެތި ހަރަދުތައް އެއްފަހަރާ ކުރުމުގެ ސީދާ ނަތީޖާއެއްގެ ގޮތުންކަމަށް އޮޑިޓް ރިޕޯޓުގައި ބުނެފައިވެއެވެ.
އޮޑިޓަރ ޖެނެރަލް ހުސައިން ނިޔާޒީ ވިދާޅުވީ ފެނަކަ މިހާރު ވެއްޓިފައި އޮތް މާލީ ހާލަތަކީ މެދުވެރިވި ހާލަތެއް ނޫންކަމަށާއި، އެއީ ކުރިމަތިކުރި ހާލަތެއް ކަމަށް ބެލުމުގެ ފުރުސަތު އެބައޮތް ކަމަށެވެ.
ރިޕޯޓުން ހާމަކުރާ އެއް ބޮޑު ގެއްލުމަކީ، ފެނަކަ ކޯޕަރޭޝަނުން އާ އިންޖީނުގެތަކާއި އޮފީސް އިމާރާތްތައް އެޅުމަށް 2023 ވަނަ އަހަރު ނިމުނުއިރު، މާކެޓް ރޭޓަށްވުރެ އިތުރަށް 767.3 މިލިޔަން ރުފިޔާ ހަރަދުކޮށްފައިވުމެވެ. މި ޕްރޮޖެކްޓްތަކަށް ކޮށްފައިވާ ހަރަދާއި ނުނިމިހުރި މަސައްކަތަށް ދޭންޖެހޭ ފައިސާ އެއްކޮށްލުމުން މި އަދަދު ފެންނަން އޮތްކަމަށް ރިޕޯޓުގައި ވެއެވެ.
މީގެ އިތުރުން ފެނަކައަށް ޖަނަރޭޓަރާއި ކޭބަލް އަދި ޓްރާންސްފޯމަރު ގަތުމަށް ހެދި އެއްބަސްވުންތަކުން، ހަގީގަތުގައި ހޭދަވާނެ ފައިސާއަށްވުރެ އިތުރަށް 287 މިލިޔަން ރުފިޔާ ހަރަދުކޮށްފައިވާކަން ވެސް ރިޕޯޓުން ފާހަގަކުރެއެވެ. ހައިރާންކުރުވަނިވި ކަމަކީ، އެގޮތަށް ހަރަދުކޮށްގެން އާ ޖަނަރޭޓަރުތަކުގެ ނަމުގައި ގެނެސްފައި ހުރީ މަރާމާތުކޮށްފައިވާ ބޭނުންކުރި ޖަނަރޭޓަރުތައްކަން އޮޑިޓް ރިޕޯޓުން ހާމަވުމެވެ.
އޮޑިޓް ރިޕޯޓުން ދައްކާ ގޮތުގައި، ފެނަކައިން ފައިސާ ހަރަދުކުރި ގާތްގަނޑަކަށް ހުރިހާ ދާއިރާއެއްގައި ވެސް ކޮރަޕްޝަނުގެ ތެރެއިން އެތައް ސަތޭކަ މިލިޔަން ރުފިޔާއެއް ގެއްލިފައިވާކަން ފާހަގަކުރެވެއެވެ. މި ރިޕޯޓަކީ ފެނަކަ ކޯޕަރޭޝަނުގެ މާލީ ހާލަތު ދަށަށް ގޮސްފައިވާ ހަގީގީ ސަބަބުތައް ފުރިހަމައަށް ހާމަކުރާ ލިޔުމެއްކަމުގައި ވަނީ ވެފައެވެ.
ކޮމެންޓު ފޮނުވާ