ފެނަކަ ކޯޕަރޭޝަންގެ 2021-2023 އަހަރުގެ މާލީ ކަންކަން ބެލި އޮޑިޓް ރިޕޯޓުން ފާހަގަވެފައިވާ ގޮތުގައި، އެމްޑީޕީގެ ޕާލިމަންޓްރީ ގްރޫޕުގެ ކުރީގެ ޑެޕިއުޓީ ލީޑަރު، ހެންވޭރު ދެކުނު ދާއިރާގެ ކުރީގެ މެންބަރު ހުސައިން ޝަމީމް (އަދުން ހުސައިން) ގެ ހިއްސާ އޮންނަ ސިރިއަސް އެންޓަޕްރައިސަސް ޕްރައިވެޓް ލިމިޓެޑަށް 111.95 މިލިއަން ރުފިޔާ ދޫކޮށްފައިވާކަން ހާމަވެއްޖެއެވެ.
އޮޑިޓާ ޖެނެރަލްގެ އޮފީހުން މިދިޔަ ބުރާސްފަތި ދުވަހު ޢާންމުކުރި މި ރިޕޯޓުން ދައްކާ ގޮތުގައި، މި ތިން އަހަރު ދުވަހުގެ ތެރޭގައި ފެނަކައިން ޖުމްލަ 127.76 މިލިއަން ރުފިޔާގެ އަޑީތެޔޮ ގަނެފައިވާއިރު، މީގެ ބޮޑު ބައެއް ގަނެފައިވަނީ އަދުން ހުސައިންގެ ކުންފުނިން ކަމަށް ރިޕޯޓުގައި ބުނެފައިވެއެވެ.
މި މުއާމަލާތްތައް ކުރިއަށް ގެންގޮސްފައިވަނީ ފެނަކަ ކޯޕަރޭޝަންގެ ޕްރޮކިއުމަންޓް ޕޮލިސީއާ ހިލާފަށް ކަމަށާއި، އެއްވެސް ރަސްމީ އެއްބަސްވުމެއް ނެތި، އާންމު ބީލަމުގެ އުސޫލުން ބޭރުން ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ. ޕާޗޭސް އޯޑަރުތައް ބަހާލައިގެން، އެއް ދުވަހެއްގައި ގިނަ އަދަދެއްގެ އޯޑަރުތައް ފޮނުވައިގެން މި މުއާމަލާތްތައް ފޮރުވުމަށް މަސައްކަތް ކޮށްފައިވާކަމަށްވެސް ރިޕޯޓުގައި ބަޔާންކޮށްފައިވެއެވެ.
މި މައްސަލައިގެ އިތުރުން، ކަރަންޓު ކޭބަލް، ޖަނަރޭޓާ ސެޓް، ޓްރާންސްފޯމަރު އަދި ފެނާއި ނަރުދަމާގެ މަޝްރޫއުތަކަށް ބޭނުންވާ ތަކެތި ގަތުމަށް ވާދަވެރި ބީލަމުގެ އުސޫލުން ބޭރުން 1.3 ބިލިއަން ރުފިޔާގެ މަސައްކަތް 438 އެއްބަސްވުމެއްގެ ދަށުން އެކި ފަރާތްތަކާއި ހަވާލުކޮށްފައިވާކަން ވަނީ އޮޑިޓް ރިޕޯޓުން ފާހަގަވެފައެވެ.
ފެނަކައިގެ ކުރީގެ މެނޭޖިން ޑިރެކްޓަރު އަހުމަދު ސައީދުގެ މައްޗަށް ކުރިން ހިޔާނާތުގެ މައްސަލައެއްގައި ދައުވާ އުފުލާފައިވާއިރު، އޭނާގެ ޝަރީއަތް މިހާރުވެސް ދަނީ ކުރިއަށެވެ. މި އައު ހާމަވުންތަކާއެކު ފެނަކައިގައި ހިނގާފައިވާ ކޮރަޕްޝަންގެ މިންވަރާމެދު ސުވާލުތައް އުފެދި، ތަޙުޤީޤީ އިދާރާތަކުން މި މައްސަލަތައް ބަލަމުންދާނެ ކަމަށް ބެލެވެއެވެ.
ކޮމެންޓު ފޮނުވާ