ފަތުރުވެރިކަމުގެ ދުވަހު ރައީސް މެސެޖު: ރައްޔިތުންނަށް ފައިދާކުރާ ދެމެހެއްޓެނިވި ފަތުރުވެރިކަމެއް ޤާއިމުކުރާނަން

ބައިނަލްއަޤްވާމީ ފަތުރުވެރިކަމުގެ ދުވަހާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެފައިވަނީ، ރާއްޖޭގެ ރަށްތަކުގެ އިޤްތިޞާދީ ހާލަތު ރަނގަޅުކޮށް، ރައްޔިތުންނަށް ސީދާ ފައިދާކުރާ ދެމެހެއްޓެނިވި ފަތުރުވެރިކަމުގެ ނިޒާމެއް ޤާއިމުކުރުމަށް ސަރުކާރުން މަސައްކަތްކުރާ ކަމަށެވެ.

އެކްސް (ޓްވިޓަރ) މެދުވެރިކޮށް ރައީސް ކުރެއްވި ޕޯސްޓެއްގައި ފާހަގަކުރެއްވީ، ދިވެހިރާއްޖޭގެ މެހެމާންދާރީގެ ޚާއްޞަ ސަގާފަތަކީ މިހާރުވެސް ދުނިޔޭގެ އެކި ހިސާބުތަކުން އަންނަ ފަތުރުވެރިން ވަރަށް ބޮޑަށް ތަޢުރީފުކުރާ ކަމެއް ކަމަށެވެ. އަދި މި ޚާއްޞަ ސިފަތައް ދަމަހައްޓަމުން، ފަތުރުވެރިކަމުގެ ކުރިއެރުން ހޯދުމަށް މަސައްކަތްކުރާނެ ކަމަށް ވިދާޅުވިއެވެ.

ފަތުރުވެރިކަމުގެ ތަރައްޤީއާއެކު ދެމެހެއްޓެނިވި ކަން ވެސް ވަރަށް މުހިންމު ކަމަށް ރައީސް ފާހަގަކުރެއްވިއެވެ. ސަރުކާރުގެ މައިގަނޑު އަމާޒަކީ ރާއްޖޭގެ ހުރިހާ ރަށެއްގެ އިޤްތިޞާދީ ހާލަތު ރަނގަޅުކޮށް، ރަށްރަށުގެ މުއްސަނދިކަން އިތުރުކޮށް، ފަތުރުވެރިކަމުގެ ފައިދާ ސީދާ ރައްޔިތުންނަށް ލިބޭނެ ގޮތް ހެދުން ކަމަށް ރައީސް ވިދާޅުވިއެވެ.

މި ވާހަކަފުޅު ދައްކަވަމުން ރައީސް ހަނދާންކޮށްދެއްވީ، ފާއިތުވި ފަސް އަހަރު ތެރޭގައި ވެސް ދުނިޔޭގެ އެންމެ މަޤްބޫލު ފަތުރުވެރިކަމުގެ މަންޒިލެއްގެ ގޮތުގައި ދިވެހިރާއްޖެ ހޮވިފައިވާ ކަމަށެވެ. މިއީ ރާއްޖޭގެ ފަތުރުވެރިކަމުގެ ފެންވަރާއި ޚިދުމަތްތަކުގެ ރަނގަޅުކަން ބައިނަލްއަޤްވާމީ ފެންވަރުގައި ގަބޫލުކުރެވިފައިވާ ކަމުގެ ހެއްކެއް ކަމުގައި ރައީސް ފާހަގަކުރެއްވިއެވެ.

ސެޕްޓެމްބަރު 27 އަކީ ކޮންމެ އަހަރަކު ވެސް ބައިނަލްއަޤްވާމީ ފަތުރުވެރިކަމުގެ ދުވަހެވެ. ދިވެހިރާއްޖެއަށް ފަތުރުވެރިކަން ފުރަތަމަ ތަޢާރަފްވީ 1972 ވަނަ އަހަރުއެވެ. އެދުވަހުން ފެށިގެން ބައި ޤަރުނު ފާއިތުވެގެން ދިޔައިރު، މިއަދު ދިވެހިރާއްޖެއަކީ ބައިނަލްއަޤްވާމީ ފެންވަރުގައި ފަތުރުވެރިކަމުގެ ނަމޫނާ މަންޒިލެއްގެ ގޮތުގައި ޤަބޫލުކުރެވިފައިވާ ޤައުމެއް ކަމަށް ވަނީ ސާބިތުވެފައެވެ.

ރައީސް މުއިއްޒުގެ ސަރުކާރުން މިހާރު ގެންދަނީ ފަތުރުވެރިކަމުގެ ދާއިރާ އިތުރަށް ފުޅާކޮށް، އޭގެ ފައިދާ ހުރިހާ ރައްޔިތުންނަށް ލިބޭނެ ގޮތް ހެދުމަށް ވަރަށް ބޮޑު އަހައްމިއްޔަތުކަމެއް ދެމުންނެވެ. މިގޮތުން ރަށްރަށުގައި ގެސްޓްހައުސް ތަރައްޤީކުރުމާއި، ކޮމިއުނިޓީ ބޭސްޑް ޓޫރިޒަމް ކުރިއަރުވައި، ފަތުރުވެރިކަމުގެ ސީދާ ފައިދާ ރައްޔިތުންނަށް ލިބޭނެ މަގު ތަނަވަސްކުރުމުގެ މަސައްކަތްތައް ކުރިއަށް ގެންދެއެވެ.