ސަރުކާރުގެ ވައުދުތައް ފުއްދުމުގެ މަސައްކަތްތައް ކަނޑައެޅިފައިވާ ތާވަލާ އެއްގޮތަށް ކުރިއަށްދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ހަތަރު އަތޮޅެއްގެ ރަށްރަށަށް ކުރައްވަމުންދާ ދަތުރުފުޅުގެ ތެރެއިން ތ. ވިލުފުށީ ރައްޔިތުންނާ ބައްދަލުކުރައްވައި ވާހަކަދައްކަވަމުންނެވެ.
ރައީސް ފާހަގަކުރެއްވި ގޮތުގައި، ސަރުކާރަށް ވާރުތަވިއިރު އިގްތިސާދު ވަނީ ވަރަށް ނާޒުކު ހާލަތެއްގައެވެ. ނަމަވެސް ފައިސާ ޗާޕުނުކޮށް، ރާއްޖެއިން ބޭރާއި އެތެރޭގެ ދަރަނިތައް ދައްކަމުން، އިގްތިސާދު ރަނގަޅަށް މެނޭޖުކޮށްގެން ރައްޔިތުންނަށް ދީފައިވާ ވައުދުތައް ފުއްދުމުގެ މަސައްކަތް ކުރިއަށް ގެންދަވާ ކަމަށް ރައީސް ވިދާޅުވިއެވެ.
މިއަހަރު ތާވަލުކޮށްފައިވާ މަޝްރޫޢުތައް ރަނގަޅަށް ކުރިއަށްދާ ކަމަށާއި، ބާކީ ހުރި ވައުދުތައް ފުއްދުމަށް ބޭނުންވާ އަމަލީ މަސައްކަތްތައް އަންނަ އަހަރު ފެށުމާއެކު ފުޅާދާއިރާއެއްގައި ކުރިއަށް ގެންދެވޭނެ ކަމަށް ރައީސް ޔަޤީންކަން ދެއްވިއެވެ. "އަޅުގަނޑު ކަނޑައަޅާފައި އޮތް ޕްލޭނާ އެއްގޮތަށް އިރާދަކުރެއްވީތީ އަޅުގަނޑުމެންނަށް ކަންކަން ކުރިއަށް އެބަ ގެންދެވޭ" ރައީސް މިފަދައިން ވިދާޅުވިއެވެ.
މިކަންކަން ކާމިޔާބުކަމާއެކު ކުރިއަށް ގެންދެވެނީ ރައްޔިތުންގެ ފުރިހަމަ އެއްބާރުލުން ލިބޭތީ ކަމަށް ރައީސް ފާހަގަކުރެއްވިއެވެ. ޚާއްސަކޮށް ޤައުމުގައި ސުލްހަމަސަލަސްކަމާއި ހަމަޖެހުން ދެމެހެއްޓުމަށް ރައްޔިތުން ދެއްވާ އެއްބާރުލުމަކީ ސަރުކާރަށް ލިބޭ އެންމެ ބޮޑު ބާރު ކަމަށް ރައީސް ވިދާޅުވިއެވެ.
"އެއީ ފެންނަން ނެތް އެއްޗެއް، އެހެންނަމަވެސް އިހުސާސްވާ އެއްޗެއް. މި ދެންނެވި ލިސްޓުގައި ހުރި ހުރިހާ ކަމެއް މި ރަށުގައި ވާނެ. އެކަންކަމުގެ ފޮނިމީރުކަން ލިބެނީ ރައްޔިތުން ތިދެއްވާ ތާޢީދު މި ޤައުމުގައި ހަމަޖެހުން ޤާއިމްކޮށް ތަހުޒީބު ޤައުމަކަށް ހެދުމަށް ކުރާ މަސައްކަތުން" ރައީސް މިހެން ވިދާޅުވިއެވެ.
ސަރުކާރުގެ އެންމެ މުހިންމު އަމާޒަކީ ޒުވާން ޖީލަށް އުޖާލާ މުސްތަޤުބަލެއް ބިނާކޮށްދިނުން ކަމަށާއި، ރާއްޖޭގެ ތާރީޚުގައި ދެކެފައިވާ ހިތާމަވެރި ދުވަސްތައް އަނބުރާ ނުގެނައުމަށް ފުރިހަމަ އަޒުމުގައި މަސައްކަތް ކުރައްވާނެ ކަމަށް ރައީސް ޔަޤީންކަން ދެއްވިއެވެ.
ކޮމެންޓު ފޮނުވާ