ބޭސްފަރުވާއަށާއި ރާއްޖޭން ބޭރަށް ދަތުރުކުރުމަށް ކުރާ ޚަރަދުތަކަށް ބީއެމްއެލްގެ ޑެބިޓް ކާޑުގެ ލިމިޓު އަންނަ ނޮވެމްބަރު 11 ވަނަ ދުވަހުން ފެށިގެން އިތުރުކުރާނެ ކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ. މ. މުލީގައި ބޭއްވި ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މި ބަދަލުތަކަކީ ޑޮލަރުގެ ދަތިކަން ކުޑަކުރުމަށް ސަރުކާރުން ގެންގުޅޭ ސިޔާސަތުގެ ބައެއްގެ ގޮތުގައި ގެނެވޭ ބަދަލުތަކެއް ކަމަށެވެ.
ރައީސް އިއުލާނުކުރެއްވި ލުއިތަކުގެ ދަށުން، ބީއެމްއެލްގެ ޑެބިޓް ކާޑުތަކުން ޕީއޯއެސް ޓާމިނަލްތަކުން ކުރާ ޕޭމަންޓްތަކުގެ ލިމިޓު 1000 ޑޮލަރަށް އިތުރުވެގެންދާނެއެވެ. އަދި އެއާލައިންތަކުން ޓިކެޓު ގަތުމަށާއި ބޭރު ގައުމުތަކުގެ ހޮޓާތަކުގައި ތިބެގެން ކުރާ ޚަރަދުތަކަށް 3000 ޑޮލަރަށް ލިމިޓު އިތުރުކުރެވޭނެއެވެ. މީގެ އިތުރުން، ބޭސްފަރުވާއަށް ކުރާ ޚަރަދުތައް ބޭންކަށް އެދުމުން، ސީދާ ބޭންކުން އެ ހޮސްޕިޓަލަށް ޑެބިޓް ކާޑުން ފައިސާ ދެއްކޭނެ އިންތިޒާމު ހަމަޖެހިގެންދާނެ ކަމަށް ވެސް ރައީސް ވިދާޅުވިއެވެ.
ޑޮލަރުގެ ދަތިކަން ހައްލުކުރުމަށް ސަރުކާރުން ކުރަމުންދާ މަސައްކަތްތަކުގެ ތެރޭގައި ރަށްރަށުގައި އޭޓީއެމް ބެހެއްޓުން ވެސް ހިމެނޭ ކަމަށް ރައީސް ފާހަގަކުރެއްވިއެވެ. މި މަސައްކަތަށް ބައެއް ފަރާތްތަކުން ފާޑުކިޔާ ކަމަށް އިޝާރާތްކުރައްވައި، ރައީސް ވިދާޅުވީ މިއީ ޑޮލަރުގެ ދަތިކަން ހައްލުކުރުމަށް ކުރަންޖެހޭ މުހިންމު ކަމެއް ކަމަށެވެ.
މިދިޔަ އޮކްޓޯބަރު މަހު ރާއްޖޭގެ މީހުން ދިރިއުޅޭ ހުރިހާ ރަށެއްގައި ރުފިޔާ އޭޓީއެމް ބެހެއްޓުމުގެ މަސައްކަތް ނިމުމަކަށް އައިސްފައިވާއިރު، މިހާރު ސަރުކާރުން އަމާޒުކުރަނީ އަންނަ އަހަރުގެ ފުރަތަމަ ތިން މަހުގެ ތެރޭގައި 40 ރަށެއްގައި ޑޮލަރު އޭޓީއެމް ބެހެއްޓުމަށް ކަމަށް ރައީސް ހާމަކުރެއްވިއެވެ. މި ފިޔަވަޅުތަކުގެ ސަބަބުން ރައްޔިތުންނަށް ޑޮލަރު ލިބުން ފަސޭހަވެ، ބޭސްފަރުވާއަށާއި ދަތުރުފަތުރަށް ކުރާ ޚަރަދުތައް ދެއްކުމުގައި ދިމާވާ ދަތިތައް ލުއިވެގެންދާނެ ކަމަށް އުންމީދުކުރެވެއެވެ.
ކޮމެންޓު ފޮނުވާ