ކޮމިޝަނުން ބުނީ، މުޒާހަރާގައި ކަންތައްތައް ހިނގައިދިޔަ ގޮތުގެ މަޢުލޫމާތު އެއްކޮށް، ފުލުހުން ބާރުގެ ބޭނުންކުރި ގޮތް ބަލައި ތަޙުގީގު ކުރިޔަށް ގެންދާ ކަމަށެވެ. ކޮމިޝަންގެ މުވައްޒަފުން އެ ދުވަހު މުޒާހަރާ ކައިރިން ބަލަހައްޓަމުން ދިޔަ ކަމަށާއި، އެންޓި-ޓޯޗާ ސެކްޝަނުން މުޒާހަރާއާ ގުޅޭ ޝަކުވާތައް ބަލަމުން ދާ ކަމަށް ވެސް އެޗްއާރުސީއެމުން ވިދާޅުވިއެވެ. ތަޙުގީގު ނިމުމުން އިތުރު ތަފުސީލު ހާމަކުރާނެ ކަމަށް ކޮމިޝަނުން ބުންޏެވެ.
އެ ދުވަހުގެ އިޙުތިޖާޖުގައި ފުލުހުން ނޫސްވެރިންނަށާއި މުޒާހަރާގެ ބައިވެރިންނަށް އަނިޔާކުރި މައްސަލަ އިދިކޮޅު އެމްޑީޕީން ވަނީ މިދިޔަ ބުދަ ދުވަހު ނޭޝަނަލް އިންޓެގްރިޓީ ކޮމިޝަނަށް ހުށަހަޅައިފައެވެ. މުޒާހަރާގައި ބައިވެރިވި މީހުންނާއި ނޫސްވެރިން ބައެއް ފަރާތްތަކަށް އަނިޔާލިބުނު ކަމަށް ބުނެ، އެކަން ދައްކުވައިދޭ ފޮޓޯތައް ސޯޝަލް މީޑިއާގައި ދައުރުވަމުން އަންނައިރު، ފުލުހުން ނަމަވެސް ބުނަނީ އެއްވެސް ފަރާތަކަށް އަނިޔާކޮށްފައި ނުވާނެ ކަމަށެވެ.
ފުލުހުން ނެރުނު ބަޔާނުގައި ބުނެފައިވަނީ، އެއްވެ އުޅުމުގެ މިނިވަންކަމުގެ ގާނޫނުގެ ދަށުން ހުއްދަ ދީފައިވާ ސަރަޙައްދުތައް ފިޔަވައި އެހެން ތަންތަނުގައި މުޒާހަރާކުރަން ބޭނުންވާނަމަ ފުލުހުންގެ ލިޔުމުގެ ހުއްދައެއް ހޯދަންޖެހޭ ކަމަށާއި، ނޫސްވެރިންގެ މުޒާހަރާ ހުއްޓުވީ އެފަދަ ހުއްދައެއް ނެތި، މަޖިލީސް ކުރާ ސަރަޙައްދުގައި އެއްވުން ބާއްވަން އުޅުމުން ކަމަށެވެ. މަޖިލީސް ކުރާ ސަރަޙައްދަކީ އެއްވުންތައް މަނާ ސަރަޙައްދެއް ކަމަށް ފުލުހުން ބުންޏެވެ.
ފުލުހުން ވިދާޅުވީ، އެ ސަރަޙައްދުގައި ޢަމަލުކުރީ ގާނޫނާ ޚިލާފު އެއްވުމެއް ހުއްޓުވައި، ޢާންމު ރައްޔިތުންނާއި މަޖިލިސް މެންބަރުންގެ ސަލާމަތާއި ރައްކާތެރިކަން ޔަގީންކުރުމުގެ ގާނޫނީ ޒިންމާ އަދާކުރުމަށް ކަމަށާއި، މުޒާހަރާގެ ބައިވެރިން ފުލުހުންގެ އޮޕަރޭޝަނަށް ހުރަސްއެޅުމުން، ޕްރޮފެޝަނަލް މިންގަނޑުތަކުގެ ތެރެއިން ބާރުގެ ބޭނުންކުރި ކަމަށެވެ. ޢާންމުކޮށް ބޭނުންކުރާ ކަރުނަ ގޭހާއި ބެޓަންފަދަ އެއްޗެހި ބޭނުންކޮށްފައި ނުވާނެ ކަމަށް ފުލުހުން ބުންޏެވެ.
ނޫސްވެރިން މުޒާހަރާކުރީ ސަރުކާރުން ހުށަހެޅި މީޑިއާ ބިލު ފާސްނުކުރުމަށް އެދުމުގެ ގޮތުންނެވެ. އެހެންނަމަވެސް، ރައްޔިތުންގެ މަޖިލީހުން އެ ބިލު ފާސްކޮށް، ރައީސް ޑރ. މުޙައްމަދު މުއިއްޒު ވަނީ ތަސްދީގުކުރައްވައިފައެވެ. މި ގާނޫނާ މެދު ދުނިޔޭގެ އެކި ގައުމުތަކާއި ބައިނަލްއަގުވާމީ ޖަމްޢިއްޔާތަކުން ކަންބޮޑުވުން ފާޅުކޮށްފައިވާއިރު، އެމެރިކާއާއި އިނގިރޭސިވިލާތުގެ އިތުރުން ނޫސްވެރިކަމަށް ވަކާލާތުކުރާ ބައިނަލްއަގުވާމީ ޖަމްޢިއްޔާތަކާއި ދިވެހި ހިއުމަން ރައިޓްސް ކޮމިޝަނުން ވެސް ވަނީ މި ގާނޫނާ ގުޅޭ ގޮތުން ކަންބޮޑުވުން ފާޅުކޮށްފައެވެ.
ކޮމެންޓު ފޮނުވާ