މާލޭ ވިޔަފާރި ބަނދަރުން ފާއިތުވި ހަފުތާގައި ކްލިއާކުރި މުދަލުގެ އަދަދު އޭގެ ކުރީ ހަފުތާއާ އަޅާބަލާއިރު 13 ޕަސެންޓް އިތުރުވެފައިވާ ކަމަށް ތަފާސްހިސާބުތަކުން ދައްކައެވެ.
ފާއިތުވި ހަފުތާގައި މާލޭ ވިޔަފާރި ބަނދަރުން ޖުމްލަ 1,540 ޓީއީޔޫ ކްލިއާކޮށްފައިވާއިރު، އޭގެ ކުރީ ހަފުތާގައި ކްލިއާކޮށްފައިވަނީ 1,359 ޓީއީޔޫއެވެ. މިއީ 181 ޓީއީޔޫގެ އިތުރުވުމެކެވެ.
ކްލިއާކުރެވުނު 1,540 ޓީއީޔޫގެ ތަފްސީލަށް ބަލާއިރު، 500 ޓީއީޔޫއަކީ 20 ފޫޓުގެ ކޮންޓެއިނާ ކަމަށާއި، 540 ޓީއީޔޫއަކީ 40 ފޫޓުގެ ކޮންޓެއިނާ ކަމަށް ވެއެވެ. މީގެ އިތުރުން 500 ޓީއީޔޫއަކީ ޕެރިޝަބުލް މުދާ ހިމެނޭ ޕެކޭޖްތަކެވެ.
ޕެރިޝަބުލް މުދަލުގެ ގޮތުގައި އެތެރެކުރެވިފައިވާ 500 ޕެކޭޖްގެ ތެރޭގައި އެކިއެކި ބާވަތްތަކުގެ ކާބޯތަކެތި ހިމެނެއެވެ. އޭގެ ތެރޭގައި 14,061 ކޭސް ބިސް، 7,749 ބަސްތާ ފިޔާ، 7,785 ބަސްތާ ކަރާ، 5,244 ކޭސް އަލުވި، 5,243 ކޭސް ޓޮމާޓޯ، 3,647 ކޭސް އަނަންނަސް، 3,518 ބަސްތާ ކެބެޖް، 2,805 ގަނޑު ދޮންކެޔޮ، 989 ބަސްތާ ބަރަބޯ އަދި 1,144 ބަސްތާ ސްވީޓްމެލަން ހިމެނެއެވެ.
މުދަލުގެ އަދަދު އިތުރުވަމުން އަންނަ މި ދުވަސްވަރު، ކާބޯތަކެތީގެ އަގު ކޮންޓްރޯލްކުރުމަށްޓަކައި ސަރުކާރުން ވަނީ ފިޔަވަޅުތަކެއް އަޅާފައެވެ. މޭވާ، ތަރުކާރީ، ބިސް އަދި މުގު ހިމެނޭގޮތުން 23 ބާވަތެއްގެ ކާބޯތަކެތި އަސާސީ ބާވަތްތަކުގެ ގޮތުގައި ކަނޑައަޅައި، އެ ބާވަތްތަކުގެ އަގު ބޮޑުވިޔަނުދިނުމަށް މަސައްކަތް ކުރަމުންދެއެވެ. މި ބާވަތްތައް އެސްޓީއޯ މެދުވެރިކޮށް ގިނަ އަދަދަކަށް އެތެރެކޮށް، ބާޒާރުގައި ސަޕްލައި ދެމެހެއްޓުމަށް ރާވާފައިވާ ކަމަށް އެ ކުންފުނިން ހާމަކޮށްފައިވެއެވެ.
ކޮމެންޓު ފޮނުވާ