ރާއްޖޭގެ ސްކޫލުތަކުގައި ހުންނަ ހޯލްތައް އޭސީކުރުމުގެ މަސައްކަތް ފެށުމަށް ސަރުކާރުން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފި އެވެ. މި މަސައްކަތަކީ "ކޫލް ސްކޫލް" މަޝްރޫއުގެ ދެވަނަ މަރުހަލާގެ ދަށުން ކުރިއަށް ގެންދެވޭނެ މަސައްކަތެއް ކަމަށް ރައީސް ވިދާޅުވި އެވެ.
ވ. ކެޔޮދޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ، "ކޫލް ސްކޫލް" މަޝްރޫއުގެ ފުރަތަމަ މަރުހަލާގައި މައިގަނޑު ގޮތެއްގައި އިސްކަން ދެވިފައިވަނީ ކްލާސް ރޫމްތަކާއި މުދައްރިސުންގެ ސްޓާފް ރޫމްތައް އޭސީކުރުމަށް ކަމަށެވެ. އަދި ސްކޫލުތަކުގެ ހޯލްތައް އޭސީކުރުމުގެ މަސައްކަތް އިރާދަކުރެއްވިއްޔާ އަންނަ އަހަރުގެ ތެރޭގައި ފަށާނެ ކަމަށް ރައީސް ޔަގީންކަން ދެއްވި އެވެ.
މި މަޝްރޫއުގެ އެންމެ ޚާއްސަ ކަމަކީ ސޯލާ ޕެނަލް ބޭނުންކޮށްގެން ކަރަންޓު އުފައްދައި، ތިމާވެށްޓާ ރައްޓެހި ގޮތަކަށް މި މަސައްކަތް ކުރިއަށް ގެންދިއުން ކަމަށް ރައީސް ފާހަގަކުރެއްވި އެވެ. މިގޮތުން ސްކޫލުތަކުގައި ސޯލާ ޕެނަލް ހަރުކޮށް، އެ ތަނުން އުފެއްދޭ ކަރަންޓު ބޭނުންކޮށްގެން އޭސީތައް ހިންގުމަށް ހަމަޖެހިފައިވާ ކަމަށް ވެސް ރައީސް ވިދާޅުވި އެވެ.
"ކޫލް ސްކޫލް" މަޝްރޫއަކީ ސަރުކާރުގެ ތައުލީމީ ދާއިރާ ކުރިއެރުވުމަށް ރާވާފައިވާ މުހިންމު މަޝްރޫއެއް ކަމަށާއި، މި މަޝްރޫއުގެ ސަބަބުން ދަރިވަރުންނަށް ފޯކަސްކޮށް ކިޔެވުމަށް މަގުފަހިވެ، ތައުލީމީ ފެންވަރު މަތިވާނެ ކަމަށް އުންމީދުކުރައްވާ ކަމަށް ރައީސް މުއިއްޒު ވިދާޅުވި އެވެ.
ކޮމެންޓު ފޮނުވާ