ރައްޔިތުންގެ މަޖިލީހުން އިއްޔެ ފާސްކުރި މީޑިއާ ކޮންޓްރޯލް ކުރާ ބިލަކީ ދިވެހިރާއްޖޭގެ ޑިމޮކްރަސީއަށް ކުރިމަތިވި ވަރަށް ބޮޑު ހިތާމައެއް ކަމަށް ކުރީގެ ރައީސް އިބްރާހިމް މުހައްމަދު ސާލިހު (އިބޫ) ވިދާޅުވެއްޖެއެވެ.
ނޫސްވެރިން މި ބިލާ ދެކޮޅަށް އިހުތިޖާޖު ކުރަމުން ދިޔަ ނަމަވެސް، ސަރުކާރު ޕާޓީގެ 60 މެންބަރުންގެ ވޯޓުން އިއްޔެ މި ބިލު ފާސްކޮށްފިއެވެ. މި ބިލަށް ދެކޮޅަށް ވޯޓު ދިނީ ހަމައެކަނި ވެލިދޫ ދާއިރާގެ މެންބަރު މުހައްމަދު އައްބާސް އެކަންޏެވެ. ވޯޓު ނެގުމުގެ ކުރިން އެމްޑީޕީގެ އެންމެހައި މެންބަރުންގެ ނަންތައް އިއްވައި، އެ ބޭފުޅުން މަޖިލީހުގެ ތަޅުމުން ބޭރުކޮށްލާފައިވެއެވެ.
ސޯޝަލް މީޑިއާ ޕްލެޓްފޯމް އެކްސްގައި ރައީސް ސާލިހް ކުރެއްވި ޕޯސްޓެއްގައި ފާހަގަކުރެއްވީ، ރައީސް ޑރ. މުހައްމަދު މުއިއްޒުގެ ސަރުކާރުން، މަޖިލީހުގައި އޮތް ސުޕަ މެޖޯރިޓީ ބޭނުންކޮށްގެން އަވަސް އަރުވައިގެން މި ބިލު ފާސްކުރުމުން ނޫސްވެރިކަމުގެ މިނިވަންކަން ނިގުޅައިގަނެފިކަމަށެވެ.
ނޫސްވެރިންނާއި، ސިޔާސީ ޕާޓީތަކާއި، މީޑިއާ މުއައްސަސާތަކާއި، މަދަނީ ޖަމިއްޔާތަކުގެ އިތުރުން އާންމު ރައްޔިތުން ފާޅުކުރި ބޮޑު ކަންބޮޑުވުންތަކަށް ރިޢާޔަތްކުރުމެއް ނެތި މި ބިލު ފާސްކުރުމުން، ރައްޔިތުންގެ ޑިމޮކްރެޓިކް ހައްޤުތަކަށް ސަރުކާރުން ދޭ އަހައްމިއްޔަތުކަން ކުޑަކަން ސާފުކޮށް ފެންނަން އޮތްކަމަށް ރައީސް ސާލިހް ވިދާޅުވިއެވެ.
މި ބިލާ ދެކޮޅަށް އެމްޑީޕީން ކުރިއަށްވެސް މަސައްކަތް ކުރަމުން ގެންދާނެކަމަށާއި، ދިވެހި ރައްޔިތުންގެ އިޖުތިމާއީ އަދި ސިޔާސީ ހައްޤުތައް ހިމާޔަތްކޮށް ދިފާޢުކުރުމުގައި އެ ޕާޓީ އަބަދުވެސް ސާބިތުވެ ތިބޭނެކަމުގެ ޔަޤީންކަން ރައީސް ސާލިހް ދެއްވިއެވެ.
ކޮމެންޓު ފޮނުވާ