ރާއްޖޭގައި މަސައްކަތް ކުރާ ބިދޭސީ މުވައްޒަފުންނަށް އިހުމާލުވާ ވަޒީފާދޭ ފަރާތްތަކާ މެދު އަންނަ ހޯމަ ދުވަހުން ފެށިގެން ފިޔަވަޅު އެޅުމަށް ހޯމް މިނިސްޓްރީން ނިންމައިފިއެވެ. މި ފިޔަވަޅުތައް އަޅާނީ އެކްސްޕެޓް ޕޯޓަލް މެދުވެރިކޮށް ކަމަށް އެ މިނިސްޓްރީން ނެރުނު އިއުލާނެއްގައި ފާހަގަކޮށްފައިވެއެވެ.
ވަޒީފާއާބެހޭ ގާނޫނަށް ވަނީ ގެނެވިފައިވާ މުހިންމު އިސްލާހުތަކެއްގެ ދަށުން، ރާއްޖެއަށް ގެނެސްފައިވާ ބިދޭސީ މުވައްޒަފުންނަށް ވަޒީފާދޭ ފަރާތުން އިހުމާލުވެއްޖެ ނަމަ، އެ ފަރާތެއް 50،000 ރުފިޔާއިން ޖޫރިމަނާ ކުރުމަށް ނިންމާފައިވާ ކަމަށް ހޯމް މިނިސްޓްރީން ހާމަކުރިއެވެ.
އަދި ވަޒީފާއާ ބެހޭ ގާނޫނުގެ 7-65 ވަނަ މާއްދާގެ (ށ) ގައި ކަނޑައަޅާފައިވާ ހާލަތްތަކުގެ ބޭރުން ހިނގާ ކަންތައްތަކުގައި، ގާނޫނުގެ 8-65 ވަނަ މާއްދާގެ (ހ) ގެ ދަށުން 100،000 ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާ ކުރެވޭނެ ކަމަށް ވެސް މިނިސްޓްރީން ބުނެއެވެ.
މި ޖޫރިމަނާތައް ނުދައްކައި ހުންނަ ފަރާތްތަކަށް އެކްސްޕެޓް ސިސްޓަމުން ލިބެމުންދާ ހިދުމަތްތައް ހުއްޓާލެވޭނެ ކަމަށް ހޯމް މިނިސްޓްރީން ވަނީ ސާފުކޮށް ބުނެފައެވެ. ޖޫރިމަނާގެ ފައިސާ ދައްކައި ހަލާސް ކުރުމަށްފަހު މެނުވީ، އެކްސްޕެޓް ސިސްޓަމް މެދުވެރިކޮށް އެއްވެސް ހިދުމަތެއް އެ ފަރާތްތަކަށް ފޯރުކޮށް ނުދޭނެ ކަމަށް މިނިސްޓްރީން އިންޒާރު ދީފައިވެއެވެ.
މި ފިޔަވަޅުތަކަކީ ރާއްޖޭގައި މަސައްކަތް ކުރާ ބިދޭސީ މުވައްޒަފުންގެ ހައްގުތައް ރައްކާތެރި ކުރުމަށާއި، ވަޒީފާދޭ ފަރާތްތަކުން ޒިންމާދާރު ގޮތެއްގައި ޢަމަލު ކުރުމަށް ބާރުއެޅުމުގެ ގޮތުން އަޅާ މުހިންމު ފިޔަވަޅުތަކެއް ކަމުގައި ފެންނަމުންދެއެވެ.
ކޮމެންޓު ފޮނުވާ