ކޭބަލްތަކަށް ގެއްލުން ދިނުމަކީ ފުރާނައަށް ނުރައްކާވެދާނެ ކަންކަން ކަމަށާއި އެފަދަ އަމަލުތައް ނުހިންގުމަށް ފެނަކައިން އިލްތިމާސް ކޮށްފިއެވެ. ފެނަކައިން މިފަދައިން އިލްތިމާސް ކޮށްފައިވާއިރު، އައްޑޫ ސިޓީގެ 41 ނަންބަރު ސަބްސްޓޭޝަންގެ ކަރަންޓު ކޭބަލަކަށް މީހަކު ގެއްލުންދިނުމުގެ ސަބަބުން ރޭގަނޑު އައްޑޫގެ ގުޅިފައިވާ ރަށްތަކުގެ ކަރަންޓު މެދުކެނޑި، އާންމުންނަށް ބޮޑު ދަތިތަކެއް ކުރިމަތިވެފައި ވެއެވެ. މި ހާދިސާގައި ކޭބަލް ބުރިކުރަން އުޅުނު މީހާ ކަރަންޓުގައި ޖެހި ބޮޑަށް ޒަޚަމްވެފައިވާކަމަށް މައުލޫމާތު ލިބެއެވެ.
ފެނަކަ ކޯޕަރޭޝަނުން ހާމަކުރި ގޮތުގައި، މި ހާދިސާ ހިނގީ ރޭ މެންދަމު ކަމަށާއި، ކޭބަލަށް ގެއްލުންދޭން އުޅުމުގެ ތެރޭގައި ކަރަންޓު ޝޯޓެއް ހިނގައި ސެންޓްރަލް ޕަވާ ހައުސް އެއްކޮށް ޑައުންވެފައިވާކަމަށެވެ. މި މައްސަލަ ހައްލުކޮށް ކަރަންޓުގެ ޚިދުމަތް އަލުން ފޯރުކޮށްދެވުނީ ގާތްގަނޑަކަށް ހަތަރު ގަޑިއިރު ފަހުން ކަމަށް ފެނަކައިން ބުނެއެވެ.
ކޭބަލް ބުރިކުރަން އުޅުނު މީހާގެ ހާލު ވަރަށް ނާޒުކު ކަމަށާއި، އޭނާގެ ބޯ ފަޅައިގެން ގޮސްފައިވާއިރު، ހަށިގަނޑުގެ ބައެއް ތަންތަން ފިހިފައިވާކަމަށް ލިބުނު މައުލޫމާތުން އެނގެއެވެ. މިވަގުތު އޭނާއަށް އައްޑޫ އެކުއަޓޯރިއަލް ހޮސްޕިޓަލުގައި ފަރުވާދެމުން އަންނަކަމަށް ވަނީ ހާމަކޮށްފައެވެ.
މިފަދަ ޢަމަލުތަކަކީ ކުންފުނީގެ މުދަލަށް ގެއްލުންވުމާއެކު، އާންމު ރައްޔިތުންނަށް ވަރަށް ބޮޑު ދަތިތައް ކުރިމަތިވާ ކަންކަން ކަމަށް ފެނަކައިން ފާހަގަކޮށްފައިވެއެވެ. އަދި މިއީ އެކަމުގައި ބައިވެރިވާ މީހުންނާއި ބައިވެރި ނުވާ އެންމެންގެ ހަށިގަނޑާއި ފުރާނައަށް ވެސް ނުރައްކާވެދާނެ ކަންކަން ކަމަށް ބުނެ، މިކަހަލަ ޢަމަލުތައް ނުހިންގުމަށް ފެނަކަ ކޯޕަރޭޝަނުން އާންމުންނަށް އިލްތިމާސްކޮށްފައިވެއެވެ.
އައްޑޫ ސިޓީގައި ކަރަންޓު ކެނޑޭ މައްސަލަ ފަހަކަށް އައިސް ވަރަށް ބޮޑުވެފައިވާއިރު، މިކަމަށް ދާއިމީ ހައްލެއް ހޯދުމުގެ މަސައްކަތް ހުއްޓާނުލައި ކުރިއަށް ގެންދާކަމަށް ފެނަކައިން ބުނެފައިވެއެވެ. ގުޅިފައިވާ ރަށްތަކުގެ އިންޖީނުގޭގެ ޖަނަރޭޓަރުތަކަށް ދިމާވާ މައްސަލަތަކުގެ ސަބަބުން ކަރަންޓު ކެނޑޭ ދަތި ހައްލުވާނީ އާ އިންޖީނުގެ އެޅުމުގެ މަސައްކަތް ނިމުމުން ކަމަށް ކުރިން ފެނަކައިން މައުލޫމާތު ދީފައިވެއެވެ.
ކޮމެންޓު ފޮނުވާ