ރައްޔިތުންގެ މަޖިލީހުގެ މާލިއްޔަތު ކޮމިޓީއާއި ސަލާމަތީ ޚިދުމަތްތަކާ ބެހޭ 241 ކޮމިޓީން ފަސް މަސް ކުރިން ވަކިކުރެއްވި ހިތަދޫ މެދު ދާއިރާގެ ޕީއެންސީ މެންބަރު އަޙްމަދު އަޒާން މަރުޒޫގް، މިއަދު އެ ދެ ކޮމިޓީއަށް އަލުން އައްޔަނުކުރައްވައިފިއެވެ. މި ނިންމުން މިއަދު ހެނދުނު ބޭއްވި މަޖިލީހުގެ ޖަލްސާގައި ރައީސް އަބްދުއްރަހީމް އަބްދުﷲ ވަނީ އިއުލާނުކުރައްވައިފައެވެ.
241 ކޮމިޓީގައި ޕީއެންސީގެ ފަރާތުން ތަމްސީލުކުރައްވަމުން ގެންދެވި ވިލިމާލޭ ދާއިރާގެ މެންބަރު މުހައްމަދު އިސްމާއިލްގެ ބަދަލުގައި އަޒާން އައްޔަނުކުރެއްވިއިރު، މާލިއްޔަތު ކޮމެޓީގައި ހެންވޭރު އުތުރު ދާއިރާގެ މެންބަރު އަހުމަދު އައިފާންގެ ބަދަލުގައި ވެސް އަޒާން ހަމަޖައްސަވައިފިކަން މަޖިލީހުގެ ރިޔާސަތުން ވަނީ އަންގަވާފައެވެ.
މެންބަރު އަޒާން މި ދެ ކޮމިޓީން ވަކިކުރެއްވީ، މެންބަރުން އިންތިޚާބުވި ޕާޓީން ވަކިވުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ގުޅިގެން ސުޕްރީމް ކޯޓުގައި ހިނގަމުންދިޔަ މައްސަލައާ ގުޅިގެންނެވެ. އެ ދުވަސްވަރު ޕީއެންސީން ހުށަހެޅި ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް ކުޑަކުރާ ބިލަށް އަޒާން ވޯޓުދޭން ދެކޮޅު ހައްދަވައި، މަޖިލީހުގެ ތަޅުން ނުކުމެވަޑައިގަތުމުން، ޕާޓީގެ ފަރާތުން ފިޔަވަޅު އަޅާނެ ކަމަށް ބުނެފައިވެއެވެ.
ފަނޑިޔާރުންގެ އަދަދު ކުޑަކުރާ ބިލު ބަލައިގަތުމަށް ވޯޓަށް އެހި ދުވަހު ޕީއެންސީގެ ދެ މެންބަރަކު ވޯޓުނުދިން ކަމަށް މެޖޯރިޓީ ލީޑަރު އިބްރާހިމް ފަލާހް ފާހަގަކުރެއްވިއިރު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް އެކަމާ ކަންބޮޑުވުން ފާޅުކުރައްވައި، އެފަދަ ކަމެއް އެއްވެސް މެންބަރަކު ކުރައްވައިގެން ނުވާނެ ކަމަށް ވިދާޅުވެފައިވެއެވެ.
ކޮމިޓީތަކުން ވަކިކުރެއްވުމާ ގުޅިގެން އޭރު އަޒާން ވިދާޅުވީ، މާލިއްޔަތު ކޮމިޓީން ވަކިކުރީ ސަރުކާރު ކުންފުނިތަކުގެ ޚިޔާނާތްތައް ބަލަމުންދާތީ ކަމަށެވެ. ސަރުކާރުގެ ހުރިހާ ކުންފުންޏެއްގެ ޕްރޮކިއުމަންޓް ދިރާސާކުރުމުގެ މަސައްކަތް ކުރިއަށްދާ ކަމަށާއި، އޭގެތެރެއިން ވެމްކޯއިން މިދިޔަ އަހަރު ތަކެތި ކުއްޔަށް ނަގަން އެކަނި 65 މިލިއަން ރުފިޔާ ޚަރަދުކޮށްފައިވާކަން ފާހަގަވި ކަމަށް އޭނާ ބުނެފައިވެއެވެ. ކޮމިޓީތަކަށް ގެނައި ބަދަލުތަކަކީ އެފަދަ ބައެއްގެ ޕްރެޝަރަށް އެޅި ފިޔަވަޅެއް ކަމުގައި ބެލެވޭ ކަމަށް ވެސް އޭނާ ވިދާޅުވެފައިވެއެވެ.
ކޮމެންޓު ފޮނުވާ