ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރުކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުށަހެޅުއްވި މުހައްމަދު ފާރިސް ތޯހާގެ ނަން، ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ރޭ ފާސްނުކުރުމަށް ނިންމައިފިއެވެ. މި ނިންމުން ނިންމީ ތޯހާއަށް ގެވެށި އަނިޔާގެ ތުހުމަތުތަކެއް އޮތް ކަމަށް އާންމުން ފޮނުވި ޝަކުވާތަކަށް ރިއާޔަތްކޮށެވެ.
ކޮމިޝަނުގެ ދެ މެންބަރުންގެ ދައުރު ހަމަވުމާ ގުޅިގެން މިދިޔަ ޖުލައި މަހު ކުރި އިއުލާނަށް އިޖާބަދިން ފަރާތްތަކުގެ ތެރެއިން ރައީސުލްޖުމްހޫރިއްޔާ މަޖިލީހަށް ފޮނުއްވީ މުހައްމަދު ފާރިސް ތޯހާ (ހ. ސޯސަން) އާއި މުހައްމަދު ޝަފީގު މަހްމޫދު (މ. ޕޮޕީ) ގެ ނަމެވެ.
ކޮމިޓީން ރޭ ބޭއްވި އިންޓަވިއުގައި ތޯހާގެ ކުރީގެ އަނބިމީހާއަށް އަނިޔާކުރި ކަމަށް ބުނާ ތުހުމަތާ ގުޅޭގޮތުން ދާންދޫ ދާއިރާގެ މެންބަރު މުހައްމަދު ފަޒީލް ސުވާލުކުރެއްވިއެވެ. އާންމުން ފޮނުވި ޝަކުވާތަކުގައި ބުނާ ގޮތުން ތޯހާގެ ކައިވެނި ރޫޅުނީ ގެވެށި އަނިޔާގެ ސަބަބުންނެވެ. ނަމަވެސް ތޯހާ ވިދާޅުވީ އެފަދަ ތުހުމަތެއް އޮތްކަން އެނގިވަޑައިނުގަންނަވާ ކަމަށާއި، އެކަމާ ގުޅިގެން އެއްވެސް އިދާރާއަކަށް ހާޒިރުކުރައްވާފައި ނުވާ ކަމަށެވެ.
އިންޓަވިއުގައި އިންސާނީ ހައްގުތަކާ ގުޅޭ ގާނޫނީ ކަންކަމާ ބެހޭގޮތުން ކުރެވުނު ސުވާލުތަކަށް ތޯހާ ދެއްވި ޖަވާބުތަކުން ފާހަގަކުރެވުނީ، ގާނޫނުގައިވާ ކަންކަން ރަނގަޅަށް ދިރާސާކުރައްވާފައި ނުވާކަމެވެ. އޭނާ ވިދާޅުވި ގޮތުގައި ގާނޫނުގައި ހުރި އެކިއެކި މާއްދާތައް ތަފްސީލުކޮށް ބައްލަވާލެއްވިފައެއް ނުވެއެވެ.
އިންޓަވިއުގެ ނަތީޖާއަށް ބަލާއިރު މުހައްމަދު ޝަފީގު މަހްމޫދަށް 75 ޕަސެންޓަށްވުރެ މަތިން މާކްސް ލިބިފައިވާއިރު، ފާރިސް ތޯހާއަށް ލިބުނީ އެއަށްވުރެ ވަރަށް ދަށް މާކެއްކެވެ. ކޮމިޓީގެ ބައްދަލުވުމުގައި ބައިވެރިވި މެންބަރުން ނިންމެވީ ޝަފީގުގެ ނަން މަޖިލީހުގެ ތަޅުމަށް ފޮނުވުމަށެވެ. އެހެންކަމުން އެޗްއާރްސީއެމްގެ މެންބަރުކަމަށް އައްޔަންކުރުމަށް މަޖިލީހުން ފާސްކުރާނީ ޝަފީގު އެކަންޏެވެ.
ހިއުމަން ރައިޓްސް ކޮމިޝަނަކީ ދިވެހިރާއްޖޭގައި އިންސާނީ ހައްގުތައް ރައްކާތެރިކޮށް ދަމަހައްޓައި، އެ ހައްގުތައް ކުރިއެރުވުމަށް މަސައްކަތްކުރާ މިނިވަން މުއައްސަސާއެކެވެ. ކޮމިޝަނުގެ މެންބަރުން އައްޔަންކުރުމުގައި އެ މަގާމަށް އެކަށީގެންވާ ތަޢުލީމީ ފެންވަރާއި ތަޖުރިބާގެ އިތުރުން، އަޚްލާގީ މިންގަނޑުތަކަށް ފެތޭ ފަރާތްތަކެއްތޯ ބެލުމަކީ މަޖިލީހުގެ ކޮމިޓީގެ މުހިންމު މަސްއޫލިއްޔަތެކެވެ.
ކޮމެންޓު ފޮނުވާ