ފ. މަގޫދޫ ކައުންސިލުން އަމިއްލަ ބަޖެޓުން ތަރައްޤީކޮށް ނިންމި މުހިންމު ތިން މަޝްރޫއު ކުރީގެ ރައީސް އިބްރާހިމް މުހައްމަދު ސޯލިހު ރޭ ހުޅުވައިދެއްވި އެވެ. މަގޫދޫގައި ބޭއްވި ޚާއްޞަ ރަސްމިއްޔާތެއްގައި ހުޅުވައިދެއްވި މި މަޝްރޫއުތަކަކީ ދަތުރުވެރިންގެ ހިޔާ، ރަސްމީ ފާލަމާއި ވޯކްވޭ، އަދި ލައިސަންސް ޓްރެކެވެ.
ކައުންސިލުން ބުނި ގޮތުގައި ދަތުރުވެރިންގެ ހިޔާ ތަރައްޤީކުރުމަށް 600،000 ރުފިޔާއަށް ވުރެ ގިނަ އަދަދެއް ޚަރަދުވެފައިވާއިރު، ރަސްމީ ފާލަމާއި ވޯކްވޭ އެޅުމަށް 100،000 ރުފިޔާއަށް ވުރެ ގިނަ އަދަދެއް ޚަރަދުވެފައިވެ އެވެ. ލައިސަންސް ޓްރެކް ތަރައްޤީކުރުމަށް ވެސް 200،000 ރުފިޔާގެ ބޮޑު ޚަރަދެއް ކޮށްފައިވާ ކަމަށް ކައުންސިލުން ފާހަގަކުރި އެވެ.
މި މަޝްރޫއުތަކުގެ އިތުރުން މަގޫދޫ ސްކޫލަށް ވެސް ކައުންސިލުން ޚާއްޞަ ސަމާލުކަމެއް ދެމުން ގެންދާކަން ފާހަގަކުރެވެ އެވެ. ސްކޫލުގައި އައު ލައިބްރަރީއެއް ޤާއިމުކުރުމާއި، ކޮމްޕިއުޓަރ ލެބެއް ޤާއިމުކުރުމާއި، ސްކޫލަށް ބޭނުންވާ އެހެނިހެން ވަސީލަތްތައް ފޯރުކޮށްދިނުމަށް ކައުންސިލުން ވަނީ ޚަރަދުތައް ކުރަން ފަށާފަ އެވެ.
ކުރީގެ ރައީސް ސޯލިހުގެ ސަރުކާރުގައި މަގޫދޫއަށް ގިނަ ތަރައްޤީގެ މަޝްރޫއުތައް ހިންގާފައިވާކަން ފާހަގަކުރެވެ އެވެ. އޭގެ ތެރޭގައި ފެނާއި ނަރުދަމާގެ ނިޒާމު ޤާއިމުކުރުމާއި، އައުޓްޑޯ ވޮލީ ކޯޓެއް އެޅުމާއި، ކުޑަކުދިންގެ ޕާކެއް ތަރައްޤީކުރުން ހިމެނެ އެވެ.
މަގޫދޫ އެއާޕޯޓުގެ މަސައްކަތް ވެސް ފެށިފައިވަނީ ސޯލިހުގެ ވެރިކަމުގައި ކަމަށްވީ ނަމަވެސް، އެ މަސައްކަތްތައް މިހާރު ހުއްޓިފައިވާކަން ރައްޔިތުން ފާހަގަކުރެ އެވެ. މި މަޝްރޫއު އަލުން ފެށުމަކީ މަގޫދޫ ރައްޔިތުންގެ ބޮޑު އެދުމެއް ކަމަށް ރަށުގެ ބައެއް ރައްޔިތުން ބުނެ އެވެ.
ކޮމެންޓު ފޮނުވާ