ރަސްމާލޭގެ މަސައްކަތް ކުރިއަށްދާ ގޮތް ބެލުމަށް ރައްޔިތުންގެ މަޖިލީހުގެ އެމްޑީޕީ ޕީޖީ ގްރޫޕުން މިއަދު އެ ސައިޓަށް ޒިޔާރަތްކޮށްފިއެވެ. މި ޒިޔާރަތަށްފަހު އެމްޑީޕީ ޕީޖީ ލީޑަރު އިބްރާހިމް ނާޒިލް ވިދާޅުވީ މިހާތަނަށް ދިޔައިރު ރަސްމާލެ ހިއްކުމުގެ 20 ޕަސެންޓް ވެސް ނުނިމޭ ކަމަށެވެ.
ނާޒިލް ފާހަގަކުރެއްވި ގޮތުގައި، މި މަޝްރޫއަށް ފައިނޭންސް ކުރާ ގޮތުގެ މައުލޫމާތު ސަރުކާރުން ސާފުކޮށް ނުދޭ ކަމަށާއި، ސަރުކާރުން ވައުދުވި ތާރީހުތަކަށް މަސައްކަތް ނުނިމޭ ކަމަށެވެ. ރައީސް ޑރ. މުހައްމަދު މުއިއްޒުގެ ފަސް އަހަރުގެ ދައުރު ނިމުމުގެ ކުރިން ރަސްމާލެ އާބާދުކުރާނެ ކަމަށް ސަރުކާރުން ވައުދުވި ނަމަވެސް އެކަން ނުވާނެ ކަމަށް އޭނާ ވިދާޅުވިއެވެ.
ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވީ، ފުށިދިއްގަރު ފަޅުން ހިއްކި ބިމަކީ އަދި އެންމެ ސަތޭކައެއްހާ ހެކްޓަރުގެ ބިމެއް ކަމަށާއި، އެ ތަނުގައި މަސައްކަތްކުރާ މީހުންނަށް މުސާރައާއި އިނާޔަތްތައް ނުލިބޭކަން ސައިޓުގައި ތިބި މީހުންނާ ވާހަކަދެއްކުމުން އެނގުނު ކަމަށެވެ. އަދި އޭނާ ވިދާޅުވީ ދިވެހި ރައްޔިތުން ރައީސް މުއިއްޒަށް ވޯޓު ދިނީ ރަސްމާލެއިން ގެވަޅާއި ފްލެޓް ލިބުމުގެ އުއްމީދުގައި ކަމަށާއި، އަމިއްލަ ފުރާނައަށް ވެސް އެ ތަން ނިމުނުހާ އަވަހަކަށް ރަސްމާލެއަށް ދިރިއުޅެން ދާނެ ކަމަށެވެ.
ވައިކަރަދޫ ދާއިރާގެ މެމްބަރު ހުސެއިން ޒިޔާދު (ފިއްޓެ) ވިދާޅުވީ، އެމްޑީޕީ ޕީޖީ ގްރޫޕްގެ މި ޒިޔާރަތާ ގުޅިގެން ސަރުކާރުން ރަސްމާލޭގެ މަސައްކަތް އަވަސްކުރާނެ ކަމަށް އުއްމީދުކުރައްވާ ކަމަށެވެ. މަސައްކަތުގެ ސްޕީޑު މިހާރަށްވުރެ އަވަސްކޮށްގެން ނޫނީ މި ސަރުކާރުގެ ބާކީ އޮތް މުއްދަތުގައި ރަސްމާލޭގައި މީހުން އާބާދު ނުކުރެވޭނެ ކަމަށް އޭނާ ފާހަގަކުރެއްވިއެވެ.
އެމްޑީޕީ ޕީޖީ ގްރޫޕުން ރަސްމާލެއަށް ޒިޔާރަތްކުރަން ޖެހުނީ، އެ ތަނުގެ ތަރައްގީއާ ބެހޭ މައުލޫމާތު ހޯދަން މަޖިލީހުގެ ތެރެއިން ކުރި މަސައްކަތް ނާކާމިޔާބުވުމުން، ސަރުކާރުން ބުނާ ސްޕީޑުގައި މަސައްކަތް ކުރިއަށް ގެންދޭތޯ ޔަގީންކުރުމަށް ކަމަށް ނާޒިލް ވިދާޅުވިއެވެ. ތަރައްގީގެ މި ކަހަލަ މަޝްރޫއުތަކާ ގުޅޭ މައުލޫމާތު ސަރުކާރުން ނުދޭތީ، އެހެން ގޮތްގޮތުން އެ މައުލޫމާތު ހޯދަން މަޖުބޫރުވެފައިވާ ކަމަށް އޭނާ ވިދާޅުވިއެވެ.
ސަރުކާރުން މިއަދު ބުނި ގޮތުގައި، ރަސްމާލެ ތަރައްގީކުރުމަށް ފުށިދިއްގަރު ފަޅުން މިހާތަނަށް 129 ހެކްޓަރުގެ ބިން ހިއްކައިފައިވާއިރު، މުޅި މަޝްރޫއުގެ ދަށުން ޖުމްލަ 1,153 ހެކްޓަރުގެ ބިން ހިއްކަން ޖެހެއެވެ. ރައީސް މުއިއްޒު ވައުދުވެފައިވަނީ ރަސްމާލެ ތަރައްގީކޮށް އެ ތަނުން 11,000 ގޯއްޗާއި 26,000 އަށްވުރެ ގިނަ ފްލެޓު ދޫކުރާނެ ކަމަށެވެ. އެއީ 240,000 އަށްވުރެ ބޮޑު އާބާދީއަކަށް ބޯހިޔާވަހިކަން ފޯރުކޮށްދިނުމަށެވެ.
ރަސްމާލެއަކީ މި ސަރުކާރުގެ ބޯހިޔާވަހިކަމުގެ "ޓޯޓަލް ސޮލިއުޝަން" ސިޔާސަތުގެ ދަށުން އެންމެ ބޮޑު އިސްކަމެއް ދީގެން 2023 ޑިސެމްބަރު 18 ގައި ތަރައްގީކުރަން ފެށި ތަނެކެވެ. އަށް މަސްދުވަހުގެ ތެރޭގައި މަސައްކަތް ނިންމާލަން ސަރުކާރުން އަމާޒު ހިފި ނަމަވެސް، އެކި ސަބަބުތަކާ ހުރެ މަސައްކަތް ލަސްވަމުން އަންނަ ކަމަށް އެމްޑީޕީން ތުހުމަތުކުރެއެވެ. އެޗްޑީސީގެ ބެލުމުގެ ދަށުން ރަސްމާލެ ހިއްކަނީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން އާއި އިންޑިއާގެ މޯހަން މުތާ އެކްސްޕޯޓްސް ކުންފުންޏާ ހަވާލުކޮށްގެންނެވެ.
ކޮމެންޓު ފޮނުވާ