މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު އެންމެ ފަހުގެ ރިޕޯޓަކުން ހާމަވެގޮސްފައިވާ ގޮތުގައި، އަންނަ 2025 ވަނަ އަހަރު ރާއްޖެއަށް 2.4 މިލިއަން ފަތުރުވެރިން ޒިޔާރަތްކުރާނެ ކަމަށް ލަފާ ކޮށްފިއެވެ.
އެމްއެމްއޭގެ ތަފާސްހިސާބުތައް ދައްކާގޮތުން މިއަހަރުގެ ފުރަތަމަ ހަ މަހުގެ ތެރޭގައި ރާއްޖެއަށް އައި ފަތުރުވެރިންގެ އަދަދު ފާއިތުވި އަހަރާ އަޅާބަލާއިރު ދެއްކެނީ ހިތްހަމަޖެހޭ ތަސްވީރެކެވެ. 2023 ވަނަ އަހަރުގެ ޖޫން މަހުގެ ނިޔަލަށް ރާއްޖެއަށް އައީ 1,015,527 ފަތުރުވެރިން ކަމަށް ވީނަމަވެސް، މިއަހަރުގެ އެ މުއްދަތުގައި 1,108,130 ފަތުރުވެރިން ރާއްޖެއަށް އައިސްފައިވެ އެވެ. މިއީ 9.1 ޕަސެންޓުގެ ކުރިއެރުމެކެވެ.
ރާއްޖޭގެ ރިސޯޓުތަކުގައި ފަތުރުވެރިން ހޭދަކުރާ މުއްދަތު ދިގުވަމުންދާކަން ވެސް އެމްއެމްއޭގެ ރިޕޯޓުން ފާހަގަކޮށްފައިވެ އެވެ. ބެޑް ނައިޓްގެ އަދަދު އިތުރުވުމަކީ ޓޫރިޒަމް ދާއިރާއަށް އިތުރު އާމްދަނީ ލިބޭނެ ކަމެއް ކަމުގައި އިޤްތިޞާދީ ޚާއްޞިންނާއި ވިޔަފާރިވެރިން ފާހަގަކުރެ އެވެ.
މި އަހަރުގެ ނިޔަލަށް ރާއްޖެއަށް ޒިޔާރަތްކުރާނެ ފަތުރުވެރިންގެ އަދަދާ ގުޅޭގޮތުން އެމްއެމްއޭ އިން ލަފާކުރަނީ 2.2 މިލިއަން ފަތުރުވެރިން އަންނާނެ ކަމަށެވެ. އެހެންނަމަވެސް ސަރުކާރުގެ އުންމީދަކީ މި އަދަދު 2.3 މިލިއަނަށް އަރާނެ ކަމެވެ. މި ތަފާތު ލަފާތަކުން ދައްކަނީ ރާއްޖޭގެ ޓޫރިޒަމް ސިނާއަތް ވަރަށް ހަލުވިކަމާއެކު ކުރިއަރަމުންދާ ކަމެވެ.
ވެލާނާ އިންޓަނޭޝަނަލް އެއާޕޯޓުގައި އާ ޕެސެންޖަރ ޓާމިނަލް ހުޅުވުމާއެކު، އަންނަ އަހަރުތަކުގައި ރާއްޖެއަށް އަންނަ ފަތުރުވެރިންގެ އަދަދު އިތުރަށް ބޮޑުވާނެ ކަމަށް އެމްއެމްއޭ އިން ވަނީ އަންދާޒާ ކޮށްފަ އެވެ. އެއާޕޯޓުގެ ކެޕޭސިޓީ އިތުރުވުމުން އިތުރު އެއާލައިންތަކަށް ރާއްޖެއަށް ދަތުރުފަތުރު ކުރުމުގެ ފުރުޞަތު ލިބި، މިކަމުގެ ސަބަބުން ފަތުރުވެރިންނަށް ރާއްޖެ ޒިޔާރަތްކުރުން ފަސޭހަވާނެ އެވެ.
ކޮމެންޓު ފޮނުވާ