ބ. އަތޮޅުގެ ތިން ރަށެއްގެ ސިއްހީ މަރުކަޒުތައް އިމާރާތްކުރުމާއި އަޕްގްރޭޑްކުރުމުގެ މަސައްކަތް ސަރުކާރުން ފެނަކަ ކޯޕަރޭޝަން ލިމިޓެޑާ ހަވާލުކޮށްފިއެވެ. މި މަޝްރޫޢުތަކުގެ އެއްބަސްވުމުގައި އިއްޔެ ސޮއިކުރެވުނެވެ.
އެއްބަސްވުމުގައި ސިއްހީ ވުޒާރާގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އިސްމާޢިލް ޢަބްދުﷲ އެވެ. އަދި ފެނަކަ ކޯޕަރޭޝަންގެ ފަރާތުން ޑެޕިއުޓީ މެނޭޖިންގ ޑިރެކްޓަރ މުޙައްމަދު އާރިފް ސޮއިކުރެއްވިއެވެ. މި ރަސްމިއްޔާތުގައި ހިތާދޫ އަދި މާޅޮސް ދާއިރާގެ މެންބަރު މުހައްމަދު ސިރުހާން ވެސް ބައިވެރިވެ ވަޑައިގެންނެވިއެވެ.
މި މަޝްރޫޢުތަކުގެ ތެރެއިން އެންމެ ބޮޑު މަސައްކަތަކީ ބ. ހިތާދޫ ސިއްހީ މަރުކަޒުގެ އައު އިމާރާތެއް ތަރައްޤީކުރުމެވެ. މި މަސައްކަތަށް 33.7 މިލިއަން ރުފިޔާ ޚަރަދުވާނެ ކަމަށް އަންދާޒާކުރެވޭއިރު، 730 ދުވަހުގެ މުއްދަތުގެ ތެރޭގައި މަސައްކަތް ނިންމާނެ ކަމަށް އެއްބަސްވެވިފައިވެއެވެ.
ބ. މާޅޮހާއި ބ. ދޮންފަނު ސިއްހީ މަރުކަޒުތައް އަޕްގްރޭޑްކުރުމުގެ މަސައްކަތަށް ކޮންމެ ރަށަކަށް 12.1 މިލިއަން ރުފިޔާ ޚަރަދުވާނެ ކަމަށް ލަފާކުރެވެއެވެ. މި ދެ ރަށުގެ މަސައްކަތް 545 ދުވަހުގެ ތެރޭގައި ފުރިހަމަކުރުމަށް އެއްބަސްވެވިފައިވެއެވެ.
މާޅޮހާއި ދޮންފަނު ސިއްހީ މަރުކަޒުތަކަށް ކުރެވޭ އަޕްގްރޭޑްގެ ތެރޭގައި ވޯޑް، ޕްރައިވެޓް ރޫމް، ލެބޯޓްރީ، ނާސް ސްޓޭޝަން، ޕްރޮސީޒަރ ރޫމް، ގަރާޖް އަދި ސްޓޯރ ރޫމް ފަދަ އާ ތަންތަން އިތުރުކުރެވޭނެއެވެ. އަދި މަރުކަޒުތަކަށް ޕޯޓިކޯއާއި ވަށާފާރު ވެސް އިތުރުކުރެވިގެންދާނެއެވެ.
މި މަޝްރޫޢުތައް ފުރިހަމަވުމުން ބ. އަތޮޅުގެ މި ތިން ރަށުގެ ރައްޔިތުންނަށް ލިބޭ ސިއްހީ ޚިދުމަތްތަކުގެ ފެންވަރު ރަނގަޅުވެ، ޒަމާނީ ވަސީލަތްތަކާއެކު ފުރިހަމަ ޚިދުމަތްތަކެއް ފޯރުކޮށްދެވޭނެ ކަމަށް އުންމީދުކުރެވެއެވެ.
ކޮމެންޓު ފޮނުވާ