ފުވައްމުލަކުގައި ރޭ ހިނގި ވަރަށް ނުރައްކާތެރި ސައިކަލު އެކްސިޑެންޓެއްގައި 17 އަހަރުގެ ޒުވާނަކު މަރުވެއްޖެ އެވެ. ފުލުހުން މިއަދު ދިން މަޢުލޫމާތުގައި ބުނެފައިވަނީ، މި ހާދިސާ ހިނގާފައިވަނީ ރޭގެ ދަންވަރު 2:40 ގައި ފުވައްމުލަކު ފުނާޑު އަވަށުގައި ކަމަށެވެ.
ފުލުހުން ދިން ތަފްސީލުތަކުން އެނގޭ ގޮތުގައި، އުމުރުން 17 އަހަރުގެ މި ޒުވާނާ ހުސްނުހީނާ މަގުން ސައިކަލު ދުއްވަމުން ދަނިކޮށް ފުރަތަމަ ޖެހިފައިވަނީ ފާރެއްގަ އެވެ. އޭގެ ފަހުން ސައިކަލުގެ ކޮންޓްރޯލް ގެއްލި، އެ ސަރަހައްދުގައި ހުރި މަގުބައްތީގެ ހޮޅިދަނޑީގައި ވަރަށް ބާރަށް ޖެހުމުގެ ސަބަބުން ޒުވާނާއަށް ވަނީ ވަރަށް ބޮޑެތި އަނިޔާތަކެއް ލިބިފަ އެވެ.
މި ހާދިސާގައި ވަރަށް ބޮޑަށް އަނިޔާވި ޒުވާނާ ވަގުތުން ހޮސްޕިޓަލަށް ގެންގޮސް ފަރުވާ ދިނުމަށް މަސައްކަތް ކުރި ނަމަވެސް، ރޭގެ 3:40 ހާއިރު އޭނާ މަރުވެފައިވާ ކަމަށް ފުލުހުން ބުނެއެވެ. މި ހާދިސާއާ ގުޅިގެން ފުލުހުން ތަޙުޤީޤު ކުރަމުން ދާ ކަމަށް ވެސް މަޢުލޫމާތު ލިބެއެވެ.
މި ހާދިސާއަކީ ފާއިތުވި މަސްދުވަސްކޮޅުގެ ތެރޭގައި ރާއްޖޭގައި ހިނގި ދެވަނަ ބޮޑު ސައިކަލު އެކްސިޑެންޓުގެ ހާދިސާ އެވެ. މީގެ ކުރިން މާލޭގައި ވެސް މިދިޔަ މަހު ހިނގި ނުރައްކާތެރި އެކްސިޑެންޓެއްގައި 17 އަހަރުގެ ޒުވާނަކު މަރުވެފައިވެ އެވެ. މިފަދަ ހާދިސާތައް އިތުރުވަމުން ދިއުމާ ގުޅިގެން، ޒުވާނުން ސައިކަލު ދުއްވުމުގައި ސަލާމަތީ ފިޔަވަޅުތައް އަޅަން ޖެހިފައިވާ ކަން ފާހަގަ ކުރެވެއެވެ.
ކޮމެންޓު ފޮނުވާ