ފަލަސްޠީން މިނިވަން ދައުލަތެއްގެ ގޮތުގައި ބަލައިގަތުމާ ގުޅޭގޮތުން ޕޯޗުގަލް ސަރުކާރުން ރައީސް މާސެލޯ ރެބެލޯ ޑީ ސޫސައާއި މައި ސިޔާސީ ޕާޓީތަކާ މަޝްވަރާކުރުމަށް ނިންމައިފިއެވެ. މި ކަމުގައި ބޮޑުވަޒީރު ލުއީސް މޮންޓެނެގްރޯ ވިދާޅުވީ ސެޕްޓެމްބަރު މަހު އޮންނަ އދގެ އާންމު މަޖިލީހުގައި މި މައްސަލައިގައި ގޮތެއް ނިންމުމަށް މަސައްކަތްކުރާނެ ކަމަށެވެ.
ޕޯޗުގަލްގެ އަވަށްޓެރި ޤައުމު ސްޕެއިން މިދިޔަ މެއި މަހު އަޔަލެންޑާއި ނޯވޭއާއެކު ފަލަސްޠީން މިނިވަން ދައުލަތެއްގެ ގޮތުގައި ބަލައިގަތުމުން، ޔޫރަޕުގެ އިތުރު ޤައުމުތަކުން ވެސް މި ފިޔަވަޅު އެޅުމަށް ގޮވާލައިފިއެވެ. އަދި ފަރަންސޭސިވިލާތުގެ ރައީސް އެމަނުއަލް މެޚްރޮން ވެސް ސެޕްޓެމްބަރު މަހު ފަލަސްޠީން ބަލައިގަންނާނެ ކަމަށް އިޢުލާނުކޮށްފިއެވެ. މިއީ ހުޅަނގުގެ ބޮޑު ޤައުމަކުން މި ފިޔަވަޅު އަޅާ ފުރަތަމަ ފަހަރެވެ.
އދގެ 193 މެންބަރު ޤައުމުގެ ތެރެއިން 144 ޤައުމުން މިހާރު ފަލަސްޠީން މިނިވަން ދައުލަތެއް ކަމަށް ޤަބޫލުކުރެއެވެ. އޭގެ ތެރޭގައި ޗައިނާ، ރަޝިޔާ، އިންޑިޔާގެ އިތުރުން އެފްރިކާ، ލެޓިން އެމެރިކާ، އޭޝިޔާ އަދި އޯޝޭނިޔާގެ ގިނަ ޤައުމުތައް ހިމެނެއެވެ. ނަމަވެސް ޔޫރަޕީ ޔޫނިއަންގެ 27 ޤައުމުގެ ތެރެއިން މި ފިޔަވަޅު އަޅާފައިވަނީ މަދު ޤައުމަކުންނެވެ.
އިނގިރޭސިވިލާތާއި ކެނެޑާ ވެސް ފަލަސްޠީން ބަލައިގަތުމާމެދު ވިސްނަމުންދާއިރު، ޕޯޗުގަލް މިހާތަނަށް މި މައްސަލައިގައި އަމަލުކޮށްފައިވަނީ ފަރުވާތެރިކަމާއެކު، ޔޫރަޕިއަން ޔޫނިއަންގެ އެހެން ޤައުމުތަކާ އެއްގޮތަށް އަމަލުކުރާނެ ކަމަށް ބުނަމުންނެވެ.
ކޮމެންޓު ފޮނުވާ