މާވަށުގައި ޒުވާނަކު މަރާލި މައްސަލައިގައި ބޭނުންކުރި ވަޅި ފުލުހުން ހޯދައިފި

ލ. މާވަށުގައި 29 އަހަރުގެ ޒުވާނަކު މަރާލި މައްސަލައިގައި ބޭނުންކުރި ކަމަށް ތުހުމަތުކުރެވޭ ވަޅި ފުލުހުން ހޯދައިފައިވެއެވެ.

މިއަދު ހެނދުނު 10:12 ގައި ފުލުހުންނަށް ރިޕޯޓުކުރި މި ހާދިސާގައި މަރާލާފައިވަނީ ލ. މާވަށް، ނަލަހިޔާގޭ މޫސާ އިބްރާހީމް (29އ) އެވެ. ފުލުހުންގެ މަޢުލޫމާތުގެ ދަށުން، ފުލުހުންގެ ޓީމަކުން މޫދަށް ފީނައިގެން ތަޙުޤީޤު ކުރިއަށް ގެންދިޔައިރު، ހަމަލާގައި ބޭނުންކުރި ވަޅި ފެނިފައިވެއެވެ.

މާވަށުގެ ރައްޔިތަކު ހާމަކުރި ގޮތުގައި، ވަޅި ހަރާފައިވަނީ މޫސާ އިބްރާހީމްގެ ކަރަށެވެ.. ހާދިސާގައި އަނިޔާވި މޫސާ އިބްރާހީމް ހޮސްޕިޓަލަށް ގެންދިޔައިރު، އޭނާ މަރުވެފައިވާ ކަމަށް ހޮސްޕިޓަލުން ކަށަވަރުކޮށްދީފައިވާ ކަމަށް ފުލުހުން ބުންޏެވެ.

މި ހާދިސާގެ ތުހުމަތުގައި ފުލުހުން ހައްޔަރުކޮށްފައިވަނީ ހދ. ނޮޅިވަރަންފަރު، އަސަރީ މަންޒިލްގެ މުހައްމަދު އިބްރާހީމް (29އ) އެވެ. ފުލުހުންގެ މަޢުލޫމާތު ދޭގޮތުގައި، ހައްޔަރުކުރެވުނު މީހާއަކީ މަސްތުވާތަކެތީގެ ކުށުގެ ރެކޯޑު އޮންނަ މީހެކެވެ.

މި މައްސަލައިގެ ތަޙުޤީޤު ފުލުހުން ކުރިއަށް ގެންދާއިރު، މާވަށުގެ ރައްޔިތުން ވަނީ މި ހާދިސާއިން ކަންބޮޑުވުން ފާޅުކޮށްފައެވެ.