ނޭޝަންސް ލީގުގައި ސްޕެއިނުން މޮޅުވެ، އެއްވަނައިގައި ދެ ޕޮއިންޓް ލީޑެއް ނަގައިފިއެވެ.
ރޭ ސްވިޒަލޭންޑާ ވާދަކޮށް ސްޕެއިނުން މެޗު ކާމިޔާބުކުރީ 0-1 ލަނޑުންނެވެ. މެޗުގައި ސްޕެއިނުން ޖެހި ހަމައެކަނި ލަނޑު ކާމިޔާބުކުރީ ފުރަތަމަހާފުގެ 14ވަނަ މިނިޓުގައި ރެއާލް ސޮސެއިޑާޑްގެ މިކޭލް އޮޔަޒަބާލްއެވެ.
މެޗުގައި ސްޕެއިންގެ ގޯލް ކީޕަރު ޑޭވިޑް ޑިހެއާ ވަނީ ސްވިޒަލޭންޑުން ފޮނުވާލި ނުރައްކާތެރި ގިނަ ހަމަލާތަކެއް ދިފާއު ކޮށްފައެވެ. މިމެޗުގައި ސްޕެއިންގެ އެޑަމާ ޓޮރޯރޭ ވަނީ ސްޕެއިންގެ ޖާޒީގައި ވާދަވެރި ފުރަތަމަ މެޗު ކުޅެފައެވެ. ދާދިފަހުން ކޮރޯނާވައިރެސްގެ ދެވަނަ ޓެސްޓު ނެގެޓިވްވުމުން ޓީމުގެ ކޭމްޕާ ގުޅުނު ސްވިޒަލޭންޑްގެ ލިވަލޫޕް ތަރި ޒެންޑަން ޝަގީރީވެސް ވަނީ މެޗުގައި ކުޅެފައެވެ. މިއީ 490 ދުވަސް ފަހުން ޝަގީރީ ގައުމީ ޓީމަށް ކުޅުނު ފުރަތަމަ މެޗެވެ. މިއީ އޭނާ ގައުމީ ޖާޒީގައި ކުޅުނު 83 ވަނަ މެޗެވެ.
މިއީ އޮޔަޒަބާލް ސްޕެއިންގެ ގައުމީ ޓީމަށް ކުޅުނު 8 މެޗެވެ. ރޭގެ މެޗާއެކު ސްޕެއިނުންވަނީ ބަލިނުވެ 15 މެޗު ހަމަކޮއްފައެވެ. އެ 15 މެޗުގެ ތެރެއިން 11 މެޗުން މޮޅުވިއިރު އެއްވަރުވެފަ ވަނީ 4 މެޗުންނެވެ. އެންމެފަހުން އަމިއްލަ ގައުމުގައި ކުޅުނު 8 މެޗުން ވެސް ސްޕެއިން މޮޅުވެފަވަނީ 1-0 ލަނޑުގެ ނަތިޖާއިންނެވެ.
މިމޮޅާއެކު ސްޕެއިނަށް ގުރޫޕްގެ އެއްވަނަ ލިބުނީ 7 ޕޮއިންޓާއެކު އެވެ. ދެވަނައިގައި އޮތީ ރޭ ޔުކްރެއިން އަތުން މޮޅުވި ޖަރުމަނެވެ. ޖަރުމަނު ދެވަނާގައި އޮތީ 5 ޕޮއިންޓު ހޯދައިގެންނެވެ. ސްވިޒަލޭންޑް އޮތީ އެންމެ ޕޮއިންޓަކާއެކު ތާވަލުގެ ފުލުގައެވެ. އަންނަ އަންގާރަ ދުވަހުގެ ރޭ ސްޕެއިން ރަށުން ބޭރުގައި ނުކުންނާނީ ޔުކްރެއިނާ ދެކޮޅަށެވެ.
