ކުދި އަދި މެދުފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށް އުފައްދާފައިވާ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން ގަތުމުގެ މަސައްކަތް ކުރިޔަށް ގެންދަނީ ގާނޫނާ އެއްގޮތަށް ކަމަށް ބޭންކް އޮފް މޯލްޑިވްސް އިން ބުނެފިއެވެ. އެމްއެމްއޭ އިން މިއަދު ބުނީ ބީއެމްއެލްގެ މި މަސައްކަތް ބޭންކިން ގާނޫނާ ހިލާފު ކަމަށް ނިންމާފައި ނުވާނެ ކަމަށެވެ.
ބީއެމްއެލުން އެ ކުންފުނީގެ ސަރުކާރުގެ ހިއްސާ ގަތުމާ ބެހޭ ހުށަހެޅުން ސަރުކާރުގައި ހުށަހަޅާފައިވާނެ ކަމަށާއި، ކެބިނެޓުން އެ ހިއްސާ ވިއްކާލުމަށް ނިންމާފައިވާ ކަމަށް ބުނެފައި ވެއެވެ. އެސް.ޑީ.އެފް.ސީގެ ހިދުމަތުން ރާއްޖޭގެ އެންމެ ކުދި ފަށާ ވިޔަފާރިތަކަށާއި، އަންހެނުން ހިންގާ ވިޔަފާރިތަކަށާއި، މަސްވެރިންނަށާއި، ދަނޑުވެރިންނަށާއި، ދެމެހެއްޓެނިވި ވިޔަފާރިތަކަށް އިސްލާމިކް ފައިނޭންސިން އެހީތެރިކަން ފޯރުކޮށްދޭނެއެވެ.
ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ ޑިޖިޓަލް ފަސްޓް ސަބްސިޑަރީ މެދުވެރިކޮށް އެމްއެސްއެމްއީތަކަށް ޒަމާނީ ބޭންކިން ތަޖުރިބާ ފޯރުކޮށްދިނުމުގެ މަސައްކަތް ކުރިއަށް ގެންދާނެ ކަމަށެވެ. ފުރަތަމަ އަހަރުގެ ތެރޭގައި 500 މިލިއަން ރުފިޔާގެ ފައިނޭންސް ދޫކުރުމަށާއި، ތިން އަހަރުގެ ތެރޭގައި މޯލްޑިވިއަން އިސްލާމިކް ސޯޝަލް ފައިނޭންސިން އިނީޝިއޭޓިވް މެދުވެރިކޮށް 300 މިލިއަން ރުފިޔާ އިންވެސްޓްކުރުމަށް ހަމަޖެހިފައިވެއެވެ.
ރައީސް އޮފީހުން ބުނެފައިވާ ގޮތުގައި ބީއެމްއެލްގެ ޕްރޮޕޯސަލްގައި ކުރިއަށްއޮތް ފަސް އަހަރުގެ ތެރޭގައި 1.9 ބިލިއަން ރުފިޔާގެ ލޯން ދޫކުރުން ހިމެނެއެވެ.
ކޮމެންޓު ފޮނުވާ