ޓްރާންސް މޯލްޑިވިއަން އެއާވޭސް (ޓީއެމްއޭ) އިން މުވައްޒަފުންގެ މުސާރައިގެ 20 އިންސައްތަ ދިވެހި ރުފިޔާއިން ދިނުމަށް ނިންމި ނިންމުމާ ގުޅިގެން، އެ ކުންފުނީގެ ޕައިލެޓުން ދަތުރުކުރުން ހުއްޓާލާނެކަމުގެ އިންޒާރު ދީފިއެވެ. މި ނިންމުން ނިންމީ މުވައްޒަފުންނާ އެއްވެސް މަޝްވަރާއެއް ނުކޮށްކަމަށް ޕައިލެޓުން ބުންޏެވެ.
މިހާތަނަށް ޓީއެމްއޭގެ މުވައްޒަފުންނަށް މުސާރަ ދެމުން އައީ ޑޮލަރުންނެވެ. ނަމަވެސް އައު އޮނިގަނޑުގެ ދަށުން މުސާރައިގެ 80 އިންސައްތަ ޑޮލަރުން ދިނުމަށާއި 20 އިންސައްތަ ރުފިޔާއިން ދިނުމަށް ހަމަޖެހިފައިވެއެވެ.
މި މައްސަލައާ ގުޅިގެން ރޭ ހުޅުމާލޭ ވޯޓާސް އެޖް ރޫފްޓޮޕްގައި ޓީއެމްއޭ މުވައްޒަފުން ބައްދަލުވުމެއް ބޭއްވިއެވެ. އެ ބައްދަލުވުމުގައި މުވައްޒަފުން ފާހަގަކުރީ މިފަދަ މުހިންމު ނިންމުމެއް ނިންމާފައިވާއިރު، އެކަމާ ބެހޭގޮތުން އެއްވެސް މަޝްވަރާއެއް ކޮށްފައި ނުވާކަމަށެވެ. އަދި ކުރިމަގުގައިވެސް މުވައްޒަފުންނާ މަޝްވަރާނުކޮށް މި ރޭޝިއޯ އިތުރުކުރުމުގެ ފުރުސަތު އޮތްކަމުގެ ކަންބޮޑުވުން ފާޅުކުރިއެވެ.
ދުނިޔޭގެ އެންމެ ބޮޑު ސީޕްލޭން ފްލީޓް އޮޕަރޭޓްކުރާ ޓީއެމްއޭއަކީ ރާއްޖޭގެ ރިސޯޓްތަކަށް ޓޫރިސްޓުން އުފުލުމުގައި ވަރަށް މުހިންމު ދައުރެއް އަދާކުރާ ކުންފުންޏެކެވެ. އެ ކުންފުނީގެ ޕައިލެޓުން އެދެނީ ކުރިން އޮތް ގޮތަށް ހުރިހާ މުވައްޒަފުންގެ މުސާރަ ޑޮލަރުން ދިނުމަށެވެ. މި މައްސަލަ ހައްލުނުވެއްޖެނަމަ ދަތުރުކުރުން ހުއްޓާލާނެކަމަށް ޕައިލެޓުން އިންޒާރު ދީފައިވެއެވެ.
މި މައްސަލަ ދިމާވީ ބޭރު ފައިސާއާ ބެހޭ ގަވާއިދަށް މިދިޔަ އޮކްޓޯބަރު މަހު ގެނައި އިސްލާހާ ގުޅިގެންނެވެ. މި އިސްލާހުގެ ދަށުން "ކެޓެގަރީ އޭ" ގައި ހިމެނޭ ކުންފުނިތަކަށް ކޮންމެ ޓޫރިސްޓެއްގެ ބޮލަކަށް 500 ޑޮލަރު ނުވަތަ މަހެއްގެ ޖުމުލަ އާމްދަނީގެ 20 އިންސައްތަ ޑޮލަރު މާރުކުރުމުގެ އިޚްތިޔާރު ލިބިގެންވެއެވެ.
ސަރުކާރަށް 52 ހަފްތާ ފުރުމުގެ މުނާސަބަތުގައި ނޮވެމްބަރު 17 ގައި ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ، ބޭރު ފައިސާ މާރުކުރުމުގެ ގަވާއިދަށް ގެނައި ބަދަލުތަކުން ރައްޔިތުންނަށާއި ވިޔަފާރިވެރިންނަށް ފައިދާ ކުރާނެކަމަށެވެ. ނަމަވެސް ޓީއެމްއޭ މުވައްޒަފުން މި ބަދަލާ ދެކޮޅަށް އިހުތިޖާޖުކުރަމުން ދާކަން ފާހަގަކުރެވެއެވެ.
ކޮމެންޓު ފޮނުވާ