މިދިޔަ ހަފްތާގައި ރާއްޖެއަށް ކުރި ވިއްސާރައިގެ ތެރޭގައި ގއ. ވިލިނގިއްޔަށް ހޮނު އެޅުނު ކަމަށް ބުނެވުނު ހާދިސާގައި އުރީދޫ ޓެލެކޮމް ޓަވަރު ނުވަތަ އެންޓަނާއަށް އެއްވެސް ގެއްލުމެއް ލިބިފައި ނުވާ ކަމަށް އެ ކުންފުނިން ބުނެފިއެވެ.
އިއްޔެ ރޭ 10:24 ގައި ވިލިނގިއްޔަށް ކުރި ގަދަ ވިއްސާރައިގެ ތެރޭގައި އެރަށު ގެއަކަށް ގެއްލުންތަކެއް ލިބުނު ކަމަށް ފުލުހުންނަށް ރިޕޯޓް ކުރެވުނެވެ. މި ހާދިސާގައި އުރީދޫ ޓަވަރު ކައިރީގައި ހުރި ގެއަކަށް ގެއްލުން ލިބުނު އިރު، މުވާސަލާތީ ޚިދުމަތްތަކަށް ވެސް ކޮންމެވެސް ވަރަކަށް ދަތިތަކެއް ކުރިމަތިވިއެވެ.
އުރީދޫގެ އޮފިޝަލަކު ބައެއް މީޑިއާތަކަށް މައުލޫމާތު ދެމުން ބުނީ، އެ ހާދިސާ ހިނގުމާ ގުޅިގެން ފުލުހުންނާއި ކުންފުނީގެ ޓެކްނިކަލް ޓީމް ވާނީ ޓަވަރު ސައިޓަށް ގޮސް ތަފްސީލީ ގޮތެއްގައި ބަލާ ހަދާފައި ކަމަށެވެ. އެ ބެލުމުގައި ޓަވަރަށް ނުވަތަ އެއްވެސް އިކުއިޕްމަންޓަކަށް ގެއްލުމެއް ލިބިފައި ނުވާ ކަން ކަށަވަރުވި ކަމަށް އޭނާ ބުންޏެވެ.
އުރީދޫގެ ޓަވަރުތަކަށް ހޮނު އެޅުން ހުއްޓުވުމަށް އެންމެ ފަހުގެ ޓެކްނޮލޮޖީ ބޭނުންކޮށްފައިވާ ކަމަށާއި، މިގޮތުން އެވޯޑިސް ލައިޓްނިން ޕްރިވެންޝަން ސިސްޓަމް ހަރުކޮށްފައިވާތީ މިފަދަ ހާދިސާތަކުން ރައްކާތެރިވާ ކަމަށް އެ ކުންފުނިން ބުނެއެވެ.
ނަމަވެސް މި ހާދިސާގައި ޓަވަރު ސައިޓަށް ކަރަންޓު ދިނުމަށް ބޭރުގައި ބަހައްޓާފައި ހުރި ކަރަންޓު ފޮއްޓަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަން ފާހަގަ ކުރެވިފައިވެއެވެ. އަދި ޓަވަރަށް ސީދާ ހޮނު އެޅި ނަމަ ސައިޓާއި އިކުއިޕްމަންޓްތަކަށް ބޮޑެތި ގެއްލުންތަކެއް ލިބޭނެ ކަމުގައި ޓެކްނިކަލް މާހިރުން ބުނެއެވެ.
ކޮމެންޓު ފޮނުވާ