ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އައްޑޫ ސިޓީގެ ހަންކެޑެ "ހަލާލް ޓޫރިޒަމް" ތަރައްޤީކުރާ ރަށެއްގެ ގޮތުގައި ކަނޑައަޅުއްވާއިފިއެވެ.
ޓޫރިޒަމް މިނިސްޓްރީން ބުނެފައިވާ ގޮތުގައި، މި މަޝްރޫޢު ތަންފީޒުކުރުމަށް ބޭނުންވާ އިޖުރާއަތުތައް ފުރިހަމަކުރުމުގެ މަސައްކަތް މިހާރު ވަނީ ފެށިފައެވެ. މިނިސްޓްރީން ފާހަގަކުރި ގޮތުގައި، ހަލާލް ޓޫރިޒަމް ތަރައްޤީކުރުމުން ރާއްޖޭގެ ފަތުރުވެރިކަމުގެ ދާއިރާ އިތުރަށް ސިންދަފާތުވެ، އައްޑޫ ސަރަހައްދުގައި އާ ވަޒީފާތައް އުފެދި، އިގުތިޞާދީ ހަރަކާތްތެރިކަން އިތުރުވާނެއެވެ.
މިދިޔަ ހުކުރު ދުވަހު ރައީސް މުއިއްޒު ވިދާޅުވެފައިވާ ގޮތުގައި، ހަލާލް ޓޫރިޒަމަށް ރަށްތައް ދޫކުރުމަށާއި އިންވެސްޓަރުންނަށް ޚާއްޞަ ލުއިތަކެއް ދިނުމަށް ސަރުކާރުން ނިންމާފައިވެއެވެ. ޓޫރިޒަމް މިނިސްޓްރީން މިކަމަށް ޚާއްޞަކުރާނެ އަތޮޅުތަކާއި ފަޅުރަށްތައް ކަނޑައަޅައި، ދޭނެ ލުއިތަކުގެ ތަފްސީލު ވެސް އާންމުކޮށްފައިވެއެވެ.
އެހެން ނަމަވެސް، އައްޑޫގައި ކުރިޔަށްގެންދަން ރާވާފައިވާ އެންމެ ބޮޑު ފަތުރުވެރިކަމުގެ މަޝްރޫޢުކަމަށްވާ ހަންކެޑެ އިންޓަގްރޭޓަޑް ޓުއަރިޒަމް ޑިވެލޮޕްމަންޓް ޕްރޮޖެކްޓުގެ މަސައްކަތް ލަސްވަމުން އަންނަކަން ފާހަގަކުރެވެއެވެ. މި މަޝްރޫޢު މީގެ ކުރިން ތިން ކުންފުންޏަކާ ހަވާލުކުރި ނަމަވެސް، އެދެވޭ ނަތީޖާ ނުލިބުމުން އެންމެ ފަހުން މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ)އާ ހަވާލުކޮށްފައިވެއެވެ.
އެމްއެފްއެމްސީއާ މަޝްރޫޢު ހަވާލުކުރި ފަހުން ވެސް މަސައްކަތުގައި ބޭނުންވާ ކުރިއެރުން ނުލިބޭތީ، ހިތަދޫ މެދު ދާއިރާގެ މެންބަރު އަހުމަދު އަޒާން މަރުޒޫގު ވަނީ އެ ކުންފުނީގެ ވެރިން މަޖިލީހަށް ހާޒިރުކުރުމަށް ހުށަހަޅާފައެވެ.
ހަންކެޑެ "ހަލާލް ޓޫރިޒަމް" ތަރައްޤީކުރާ ރަށެއްގެ ގޮތުގައި ކަނޑައަޅުއްވުމުން ރާއްޖޭގެ ފަތުރުވެރިކަމުގެ ސިނާއަތް އިތުރަށް ފުޅާކޮށް، އާ ބާޒާރުތަކަށް ހުޅުވާލުމަށް މަގުފަހުވެގެންދާނެކަމަށް ބެލެވެއެވެ.
ކޮމެންޓު ފޮނުވާ