ޒުވާނުންގެ ސިޔާސީ ބައިވެރިވުމާ ބެހޭގޮތުން މަޝްވަރާކުރުމަށް ޔޫތް މިނިސްޓްރީން އިންތިޒާމްކުރާ "ޒުވާނުންގެ ހޮޅުއަށި" ޕްރޮގްރާމް މިމަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ ކަމަށް އެ މިނިސްޓްރީން ހާމަކޮށްފިއެވެ.
މިފަހަރުގެ ސެޝަން ބޭއްވޭނީ ހަވީރު 8:30 އިން 10:00 އަށް މާލޭގެ ސޯޝަލް ސެންޓަރުގައެވެ. "ޔޫތު ޕޮލިޓިކަލް ޕާޓިސިޕޭޝަން" މި މައުޟޫއުގެ ދަށުން ޒުވާނުންނަށް ސިޔާސީ ދާއިރާގައި ބައިވެރިވުމުގެ މުހިންމުކަމާއި، އެކަމަށް ހުރި ފުރުސަތުތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރެވޭނެއެވެ.
މި ޕްރޮގްރާމަކީ ޒުވާނުންނަށް އެމީހުންގެ ޚިޔާލުތަކާއި ތަޖުރިބާތައް ހިއްސާކޮށް، މުޖުތަމަޢުގައި ދިމާވާ ކަންކަމާ ބެހޭގޮތުން ވާހަކަދައްކާލުމުގެ ފުރުސަތު ފަހިކޮށްދިނުމަށް ޔޫތް މިނިސްޓްރީން ދަމަހައްޓަމުން އަންނަ ސިލްސިލާ ބައްދަލުވުންތަކެއްކަން ފާހަގަކުރެވެއެވެ.
ބައިވެރިވުމަށް ޝައުޤުވެރިވާ ފަރާތްތަކަށް 4000567 އަށް ގުޅައިގެން ނުވަތަ މިނިސްޓްރީން ތައްޔާރުކޮށްފައިވާ ކިއުއާރް ކޯޑް މެދުވެރިކޮށް ރަޖިސްޓަރީ ވެވޭނެއެވެ.
ޒުވާނުންގެ ތަރައްޤީއަށް މަސައްކަތްކުރާ ޔޫތް މިނިސްޓްރީން ވަނީ މިފަދަ މަޢުލޫމާތު ސެޝަންތަކުގެ އިތުރުން، ކުޅިވަރު މުބާރާތްތަކާއި، ހުނަރު ތަމްރީނު ޕްރޮގްރާމްތަކާއި، އިޖްތިމާޢީ ހަރަކާތްތައް ހިންގަމުން ގެންދާކަން ހާމަކޮށްފައެވެ. ޚާއްސަގޮތެއްގައި ޒުވާނުންނަށް ވަޒީފާގެ ފުރުސަތު ހޯދުމުގައި ދިމާވާ ދަތިތަކަށް ހައްލު ހޯދުމަށްވެސް މިނިސްޓްރީން ކުރަމުންދާ މަސައްކަތްތައް ފުޅާކުރަމުން ގެންދާކަމަށް ބުނެފައިވެއެވެ.
ކޮމެންޓު ފޮނުވާ