ދިވެހި ދައުލަތުން ޕެންޝަނަށް ޚަރަދުކުރާ އަދަދު ބޮޑުތަނުން އިތުރުވެއްޖެއެވެ. ނެޝަނަލް ސްޓެޓިސްޓިކް ބިއުރޯއިން ހާމަކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، ފާއިތުވި އަހަރު ދައުލަތުން ޕެންޝަނަށް ޚަރަދުކޮށްފައިވަނީ 1.8 ބިލިޔަން ރުފިޔާއެވެ. މިއީ 2023 ވަނަ އަހަރު ޚަރަދުކުރި 1.7 ބިލިޔަން ރުފިޔާއާ އަޅާބަލާއިރު 7 އިންސައްތަ އިތުރުވުމެކެވެ.
ޕެންޝަން އެޑްމިނިސްޓްރޭޓިވް އޮފީހުގެ މައުލޫމާތުތަކަށް ބިނާކޮށް ނެރެފައިވާ މި ރިޕޯޓުގައި ބަޔާންކޮށްފައިވާ ގޮތުގައި، ރިޓަޔަމަންޓް ޕެންޝަންގެ ގޮތުގައި ފާއިތުވި އަހަރު ދޫކޮށްފައިވަނީ 165 މިލިޔަން ރުފިޔާއެވެ. މިއީ އޭގެ ކުރީ އަހަރާ އަޅާބަލާއިރު 13 އިންސައްތަ އިތުރުވުމެކެވެ. 2023 ވަނަ އަހަރު ރިޓަޔަމަންޓް ޕެންޝަނަށް ދޫކުރި އަދަދަކީ 146 މިލިޔަން ރުފިޔާއެވެ.
ރިޓަޔަމަންޓް ޕެންޝަން ލިބޭ ފަރާތްތަކުގެ ތެރޭގައި ފިރިހެނުންގެ އަދަދު ގިނަ ނަމަވެސް، ފާއިތުވި އަހަރު އަންހެނުންނަށް ދޫކުރި އަދަދުގައި ވަނީ ބޮޑު އިތުރުވުމެއް އައިސްފައެވެ. އަންހެނުންނަށް ރިޓަޔަމަންޓް ޕެންޝަންގެ ގޮތުގައި ދޫކޮށްފައިވަނީ 38 މިލިޔަން ރުފިޔާއެވެ. މިއީ އޭގެ ކުރީ އަހަރު ދޫކުރި 27 މިލިޔަން ރުފިޔާއާ އަޅާބަލާއިރު ވަރަށް ބޮޑު އިތުރުވުމެކެވެ. ފިރިހެނުންނަށް ދޫކޮށްފައިވަނީ 126 މިލިޔަން ރުފިޔާއެވެ. މިއީ 2023 ގައި ދޫކުރި 118 މިލިޔަން ރުފިޔާއަށް ވުރެ އިތުރު އަދަދެކެވެ.
އުމުރުން 65 އަހަރު ފުރޭ ދިވެހިންނަށް ޕެންޝަނާ ބެހޭ ޤާނޫނުގެ ދަށުން ފޯރުކޮށްދޭ އަސާސީ ޕެންޝަނަށް ވެސް ޚަރަދުކުރާ އަދަދު ވަނީ އިތުރުވެފައެވެ. ފާއިތުވި އަހަރު އަސާސީ ޕެންޝަނަށް ޚަރަދުކޮށްފައިވާ 1.3 ބިލިޔަން ރުފިޔާއަކީ އޭގެ ކުރީ އަހަރާ އަޅާބަލާއިރު 7 އިންސައްތަ އިތުރު އަދަދެކެވެ. 2023 ވަނަ އަހަރު އަސާސީ ޕެންޝަނަށް ޚަރަދުކުރީ 1.2 ބިލިޔަން ރުފިޔާއެވެ.
އަސާސީ ޕެންޝަންގެ ގޮތުގައި ދޫކުރި ފައިސާ އަންހެނުންނާއި ފިރިހެނުންނާ ދެމެދު ވަނީ ހަމަހަމަ ގޮތެއްގައި ބެހިފައެވެ. އަންހެނުންނަށް 638 މިލިޔަން ރުފިޔާ އަދި ފިރިހެނުންނަށް 635 މިލިޔަން ރުފިޔާ ދޫކޮށްފައިވެއެވެ. މި ޕެންޝަނަކީ ވަޒީފާ އަދާނުކުރާ ނުވަތަ ރިޓަޔަރމަންޓް ޕެންޝަން ސްކީމަށް އެކަށޭނަ ފައިސާ ޖަމާނުވާ ދިވެހިންގެ އަސާސީ ބޭނުންތައް ފުއްދުމަށް ދޭ އެހީއެކެވެ.
ތަފާސްހިސާބުތަކުން ދައްކާ ގޮތުގައި އެހެނިހެން ޕެންޝަންތަކަށް ފާއިތުވި އަހަރު ޚަރަދުކޮށްފައިވަނީ 364 މިލިޔަން ރުފިޔާއެވެ. މިއީ އޭގެ ކުރީ އަހަރު ޚަރަދުކުރި 358 މިލިޔަން ރުފިޔާއަށް ވުރެ ކުޑަކޮށް އިތުރު އަދަދެކެވެ. އެންމެ ފަހުން ދައުލަތުން ޕެންޝަނަށް ޚަރަދުކުރާ ޖުމްލަ އަދަދު 1.8 ބިލިޔަން ރުފިޔާއަށް އަރާފައިވާއިރު، މިއީ ޕެންޝަން ނިޒާމު ފުޅާވަމުންދާ މިންވަރު ދައްކުވައިދޭ ކަމުގެ ހެއްކެކެވެ.
ކޮމެންޓު ފޮނުވާ