ޝައިޚު ފަރީދު މެލޭޝިއާއަށް ވަޑައިގެންނެވީ ރާއްޖޭގައި ލާލް ޓޫރިޒަމް ޕްރޮމޯޓް ކުރުމުގެ މަސައްކަތުގައި

މިހަފްތާގެ ހޯމަ ދުވަހު މެލޭޝިއާގެ އެއަރޕޯޓުގައި ނިޔާވި މަޝްހޫރު ދީނީ އިލްމުވެރިޔާ ޝައިހް އިބްރާހީމް ފަރީދު އަހްމަދު މެލޭޝިއާއަށް ވަޑައިގެންނެވީ ރާއްޖޭގައި ހަލާލް ޓޫރިޒަމް ކުރިއެރުވުމަށް މަސައްކަތާގުލޭ މަޝްވަރާތަކަކަށް ކަން އެގިއްޖެއެވެ.

އިސްލާމީ ދިރިއުޅުން ޕްރޮމޯޓް ކުރުމުގައި މަސައްކަތް ކުރާ ޓިކްޓޮކް އިންފްލުއެންސާ ޝޮއައިބް ވިދާޅުވި ގޮތުގައި، ޝައިހް ފަރީދުގެ އިތުރުން އިތުރު ދެ ޝައިހަކު މެލޭޝިއާއަށް ވަޑައިގެންފައިވަނީ ރާއްޖޭގައި ހަލާލް ޓޫރިޒަމް ފުޅާކުރުމުގެ މަޝްވަރާތައް ކުރުމަށެވެ. ނަމަވެސް މި މަސައްކަތް ފެށުމުގެ ކުރިން ޝައިހް ފަރީދު ދުނިޔެއާ ވަކިވެވަޑައިގަތީކަމަށް އޭނާ ވިދާޅުވިއެވެ.

މޯލްޑިވްސް އިސްލާމިކް ޓޫރިޒަމް އިން ފާހަގަކުރި ގޮތުގައި، ޝައިހް ފަރީދަކީ ރާއްޖޭގައި އިސްލާމީ ފަތުރުވެރިކަން ކުރިއެރުވުމުގައި އެންމެ އިސްކޮށް މަސައްކަތް ކުރެއްވި ބޭފުޅެކެވެ. އޭނާގެ މަސައްކަތުގެ ނަތީޖާއެއްގެ ގޮތުން ރާއްޖެ މުސްލިމް ފަތުރުވެރިންގެ މުހިންމު މަންޒިލަކަށް ވެފައިވާ ކަމަށް އެ ޖަމްއިއްޔާއިން ބުންޏެވެ. ހަލާލް ކާނާއާއި، ނަމާދުކުރެވޭނެ ތަންތަނާއި، ޕްރައިވެޓް ރިޓްރީޓްތައް ހިމެނޭ ގޮތަށް މުސްލިމް ފަތުރުވެރިންނަށް ޚިދުމަތް ފޯރުކޮށްދިނުމުގައި ޝައިހް ފަރީދުގެ ދައުރު ވަރަށް ބޮޑު ކަމަށް ފާހަގަކޮށްފައި ވެއެވެ.

ދީނީ އިލްމުވެރިޔާ ޝައިހް އަލީ ޒައިދު ހިއްސާކުރި މަޢުލޫމާތުގައިވާ ގޮތުން، ޝައިހް ފަރީދުގެ މޫނު ބެލުމަށް މިއަދު މެންދުރު 11:00 އިން 12:30 އަށް ފުރުސަތު ހުޅުވާލެވިފައިވެއެވެ. ޖަނާޒާ އޮތީ މިއަދު  މެންދުރު ނަމާދަށްފަހު މެލޭޝިއާގެ ރާޖާ ހާޖީ ފީސަބީލިއްލާހި މަސްޖިދުގައެވެ. އަދި ވަޅުލާފައިވަނީ ޓަނާހް ޕެރްކުބުރަން ރައުދަތުލް ބާގީގައެވެ.

ޝޮއައިބް އެދިވަޑައިގެންފައިވަނީ ޖަނާޒާގެ ކަންތައްތަކުގައި ވީހާވެސް ގިނަ ބަޔަކު ބައިވެރިވުމަށާއި، ބައިވެރިނުވެވޭ ފަރާތްތަކުން ޝައިހްގެ މައްޗަށް ދުޢާކޮށްދިނުމަށެވެ. ރާއްޖޭގައި ޝައިހް ފަރީދުގެ ޣައިބު ނަމާދު ކުރުމަށް ހަމަޖެހިފައިވަނީ ހުކުރު ދުވަހު ހުކުރު ނަމާދަށްފަހު ރާއްޖޭގެ ހުރިހާ މިސްކިތްތަކުގައެވެ.

ޝައިހް އިބްރާހީމް ފަރީދަކީ ރާއްޖޭގައި އިސްލާމީ އުސޫލުތަކާ އެއްގޮތަށް ފަތުރުވެރިކަން ތަރައްގީކުރުމުގައި ނުހަނު ބުރަ މަސައްކަތެއް ކުރެއްވި، ވިސްނުންތެރި ދީނީ އިލްމުވެރިއެކެވެ. އޭނާގެ މަސައްކަތުން ރާއްޖޭގެ ހިތްގައިމު ރީތިކަމާއި ސަގާފަތް އެތައް މުސްލިމް ފަތުރުވެރިންނަކަށް ތަޖުރިބާކުރުމުގެ ފުރުސަތު ލިބިގެން ދިޔައެވެ.