ދުނިޔޭގެ ކަނޑުތަކާ ބެހޭ ދުވަސް ފާހަގަކުރާ މިއަދު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މޫސުމީ ބަދަލުތަކުގެ ސަބަބުން ދިވެހިރާއްޖޭގެ މަސްވެރިކަމާއި ގޮނޑުދޮށްތަކަށް ކުރަމުންދާ ގެއްލުންތައް ފާހަގަކުރައްވައިފިއެވެ.
ރައީސުލްޖުމްހޫރިއްޔާ މިއަދު ކުރެއްވި އެކްސް ޕޯސްޓެއްގައި ފާހަގަކުރެއްވި ގޮތުގައި، ދުނިޔޭގެ ސިއްހަތު ރަނގަޅަށް ބެހެއްޓުމުގައި ކަނޑުތަކުގެ ދައުރު ވަރަށް މުހިންމެވެ. ޚާއްސަގޮތެއްގައި ދިވެހިރާއްޖެ ފަދަ ކުދި ޖަޒީރާ ގައުމުތަކަށް ކަނޑަކީ ހަމައެކަނި ގުދުރަތީ ވަސީލަތެއް ނޫން ކަމަށާއި، އެއީ ދިވެހި މުޖުތަމަޢުގެ ދިރިއުޅުމުގެ އަސާސީ ބައެއް ކަމަށް ރައީސް ވިދާޅުވިއެވެ.
ރައީސް ފާހަގަކުރެއްވި ގޮތުގައި، ދިވެހިރާއްޖޭގެ އިގްތިސާދީ ހަރަކާތްތަކުގެ ބޮޑު ބައެއް ކަމުގައިވާ މަސްވެރިކަމާއި ފަތުރުވެރިކަމުގެ އިތުރުން އެހެނިހެން ދާއިރާތަކުން ލިބޭ އާމްދަނީ ވެސް ސީދާގޮތުން ގުޅިފައިވަނީ ކަނޑާއެވެ. ނަމަވެސް މޫސުމީ ބަދަލުތަކުގެ ސަބަބުން މަހުގެ އާބާދީތައް ދަށްވަމުން އަންނަ ކަމަށާއި، ގޮނޑުދޮށްތައް ގިރައި ހަލާކުވުމުން ފަތުރުވެރިކަމުގެ ސިނާޢަތަށް ނޭދެވޭ އަސަރުތައް ކުރަމުންދާ ކަމަށް ރައީސް ވިދާޅުވިއެވެ.
އަދި ކަނޑުގެ ފެން ހޫނުވުމުގެ ސަބަބުން މަސްތައް ދިރިއުޅޭ ސަރަޙައްދުތަކަށް ބަދަލުތައް އަންނަމުންދާ ކަން ވެސް ރައީސް ފާހަގަކުރެއްވިއެވެ. މިކަމުގެ ސަބަބުން ރާއްޖޭގެ މަސްވެރިންނަށް މަސް ބާނާ ސަރަޙައްދުތައް ހޯދުމުގައި ދަތިތަކާ ކުރިމަތިލާން ޖެހެމުންދާ ކަން އެނގެއެވެ.
މި ދަތި ހާލަތާ ކުރިމަތިލުމަށް ރައީސް ގޮވާލެއްވީ، ކަނޑުތަކާ ބެހޭގޮތުން އިތުރަށް ދިރާސާކޮށް، ކަނޑުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަށް އަދި ކަނޑު ރައްކާތެރިކުރުމަށް އަލުން ޢަޒުމް ކަނޑައެޅުމަށެވެ.
ދިވެހިރާއްޖޭގެ އިގްތިސާދަށް އެންމެ ބޮޑު އެހީތެރިކަން ފޯރުކޮށްދޭ ދެ ދާއިރާ ކަމުގައިވާ މަސްވެރިކަމާއި ފަތުރުވެރިކަން ސީދާގޮތުން ބަރޯސާވެފައިވަނީ ކަނޑުގެ ވަސީލަތްތަކުގެ މައްޗަށެވެ. އެހެންކަމުން މޫސުމީ ބަދަލުތަކުގެ ސަބަބުން ކަނޑަށް ކުރާ އަސަރުތަކަކީ ރާއްޖޭގެ އިގްތިސާދަށާއި ރައްޔިތުންގެ ދިރިއުޅުމަށް ސީދާ ގޮތުން ނޭދެވޭ އަސަރުކުރާނެ ކަންކަން ކަމުގައި ތަޖުރިބާކާރުން ފާހަގަކުރެއެވެ.
ކޮމެންޓު ފޮނުވާ