ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލޭގެ ރިވައިސްޑް މާސްޓާ ޕްލޭނަށް އާންމުންގެ ޚިޔާލު ހޯދުމުގެ ފުރުޞަތު ހުޅުވައިލައިފިއެވެ. މި ޕްލޭނަށް ގެނެވުނު ބަދަލުތަކުގެ ތެރޭގައި ހުޅުމާލޭ ބަނދަރުގެ ޖާގަ ފުޅާކުރުމާއި، އިތުރު ތަރައްޤީގެ މަޝްރޫޢުތައް ހިންގުމަށް ބޭނުންވާ ޖާގަ ހޯދުން ހިމެނެއެވެ.
އެޗްޑީސީގެ ފަރާތުން ހާމަކުރި ގޮތުގައި، މި ބަދަލުތަކަކީ ހުޅުމާލޭގައި ދިރިއުޅޭ މީހުންނަށް އިތުރު ފަސޭހަތަކާއި ޚިދުމަތްތައް ފޯރުކޮށްދިނުމަށް ކުރެވޭ މަސައްކަތުގެ ބައެކެވެ. ރިވައިސްޑް މާސްޓާ ޕްލޭނުގެ ތަފްޞީލު މަޢުލޫމާތު އެޗްޑީސީގެ ވެބްސައިޓުން ލިބެން ހުންނާނެއެވެ.
އާންމުންނަށް އޮންލައިންކޮށް ޚިޔާލު ފޮނުވުމުގެ ނިޒާމު ޤާއިމުކޮށްފައިވާ އިރު، މި ފުރުޞަތު ބޭނުންކުރެވޭނީ އަންނަ މަހުގެ 16 ވަނަ ދުވަހުގެ ނިޔަލަށެވެ. ލިބޭ ޚިޔާލުތަކާއި ހުށަހެޅުންތަކަށް ރިޢާޔަތްކުރުމަށްފަހު މާސްޓާ ޕްލޭން ވާނީ ފައިނަލްކުރެވޭނެ ކަމަށް އެޗްޑީސީން ބުނެފައިވެއެވެ.
އެޗްޑީސީގެ ފަރާތުން ބުނި ގޮތުގައި، ހުޅުމާލެ ތަރައްޤީކުރުމުގައި އާންމުންގެ ބައިވެރިވުމާއި މަޝްވަރާއަށް އަބަދުވެސް އިސްކަން ދޭ ކަމަށާއި، ޒަމާނީ ވަސީލަތްތައް ޤާއިމުކޮށްގެން ދިރިއުޅުމަށް އެންމެ އެކަށީގެންވާ ސިޓީއަކަށް ހުޅުމާލެ ހެދުމަށް މަސައްކަތްކުރާ ކަމަށެވެ.
ރައީސް ޑރ. މުޙައްމަދު މުއިއްޒު ވަނީ މި ރިވައިސްޑް މާސްޓާ ޕްލޭން ރަސްމީކޮށް ލޯންޗުކޮށްދެއްވައިފައެވެ. ރައީސުލްޖުމްހޫރިއްޔާ ވިދާޅުވި ގޮތުގައި، މި ޕްލޭނަކީ ދިގު މުއްދަތަށް ބަލައިގެން އެކުލަވައިލެވިފައިވާ، ދެމެހެއްޓެނިވި ތަރައްޤީ ކަށަވަރުކުރާނެ ޕްލޭނެކެވެ.
ގްރޭޓަރ މާލޭ ސަރަޙައްދުގެ މާލީ މަރުކަޒެއްގެ ގޮތުގައި ހުޅުމާލެ ތަރައްޤީކުރުމަށް މި ޕްލޭނުން ފުރުޞަތު ފަހިވާނެ ކަމަށް ރައީސް ފާހަގަކުރެއްވިއެވެ. އަދި މާލޭގެ ބޮޑު އާބާދީގެ މައްސަލައަށް ޙައްލު ހޯދުމުގެ މަސައްކަތްތައް ކުރިއަށްދާ ކަމަށް ވިދާޅުވިއެވެ.
މީގެ އިތުރުން، ސަރުކާރުގެ އިދާރާތަކާއި ކުންފުނިތައް ހިންގުމުގައި ނަޒާހަތްތެރިކަން އިތުރުކޮށް، ކޮރަޕްޝަނާ ދުރުވެ ހިންގުމަށް ރައީސް ގޮވާލެއްވިއެވެ. ކޮރަޕްޝަން ހުއްޓުވުމަކީ ސަރުކާރުގެ މުހިންމު އެޖެންޑާއެއް ކަމަށާއި، މި ކަމުގައި އެއްވެސް ލުއެއް ނުދެއްވާނެ ކަމަށް ރައީސް ވަނީ ޔަޤީންކަން ދެއްވައިފައެވެ.
ކޮމެންޓު ފޮނުވާ