ހުޅުމާލޭގެ އައު މާސްޓަރޕްލޭން ތަންފީޒު ކުރެވިގެން ދާއިރު ތިން ލައްކައެއްހާ ދިވެހި ރައްޔިތުންނަށް ރަނގަޅު ފެންވަރުގެ ދިރިއުޅުން ލިބިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިކަން ރައީސް ހާމަކުރެއްވީ ހުޅުމާލޭގެ މާސްޓަރޕްލޭން ރަސްމީކޮށް ހުޅުވުމުގެ ޙަފްލާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ހުޅުމާލެ ފައިނޭންޝަލް ހަބަކަށް ހެދުމަކީ އެމަނިކުފާނުގެ ވަރަށް ބޮޑު އަމާޒެކެވެ. މާލޭގައި ސަރުކާރުގެ އިދާރީ މަރުކަޒު ޤާއިމުވެފައިވާ އެއާ ގުޅޭގޮތުން، މާލީ ދާއިރާގެ މަރުކަޒަކަށް ހުޅުމާލެ ބަދަލުކުރުމަކީ ޤައުމުގެ ތަރައްޤީއަށް މުހިންމު ކަމެއް ކަމުގައި ރައީސް ދެކިވަޑައިގަންނަވާ ކަމަށް ވިދާޅުވިއެވެ.
މި މާސްޓަރޕްލޭން ކާމިޔާބުކަމާއެކު ތަންފީޒު ކުރުމަށްޓަކައި ހުރިހާ ފަރާތްތަކުން އެއްބާރުލައްވައި، އެއް ވިސްނުމަކަށް އައިސްގެން މަސައްކަތް ކުރުމުގެ މުހިންމުކަން ރައީސުލްޖުމްހޫރިއްޔާ އިތުރަށް ފާހަގަކުރެއްވިއެވެ. މި ޕްލޭން ފުރިހަމައަށް ތަންފީޒު ކުރެވިއްޖެނަމަ، ތިން ލައްކައަށް ވުރެ ގިނަ ރައްޔިތުންނަށް މަތީ ފެންވަރުގެ ދިރިއުޅުމެއް ހޯދައިދެވޭނެ ކަމަށް ރައީސް ޔަޤީންކަން ދެއްވިއެވެ.
އެޗްޑީސީގެ މި އައު މާސްޓަރޕްލޭންގެ ސަބަބުން ހުޅުމާލޭގެ ރައްޔިތުންނަށް އުފާވެރި، ހިތްހަމަޖެހޭ ވެށްޓެއް ޤާއިމުވެގެންދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މާލޭގެ ބޮޑުވާ ތޮއްޖެހުން ކުޑަކުރުމުގެ މަސައްކަތްތައް ކުރިއަށްދާއިރު، މި ތަޖުރިބާތަކުން ފިލާވަޅު ނަގައިގެން ހުޅުމާލޭގެ ތަރައްޤީ ކުރިއަށް ގެންދާނެ ކަމަށް ވިދާޅުވިއެވެ.
ރައީސުލްޖުމްހޫރިއްޔާ ޔަޤީންކަން ދެއްވި ގޮތުގައި، މި ޕްލޭން ޙަޤީޤަތަކަށް ހެދުމަށް ސަރުކާރުގެ އެންމެހައި މުއައްސަސާތަކުން ފުރިހަމަ އެއްބާރުލުން ދޭނެއެވެ. މި ބޮޑު މަޝްރޫޢު ކާމިޔާބު ކުރުމަށް ސަރުކާރުން ހުރިހާ ވަސީލަތްތަކެއް ބޭނުންކުރާނެ ކަމުގެ ޔަޤީންކަން އެމަނިކުފާނު ދެއްވިއެވެ.
މިއަދުގެ ރަސްމިއްޔާތުގައި އެޗްޑީސީގެ އައު ވެބްސައިޓްވެސް ރަސްމީކޮށް ހުޅުވިފައިވެއެވެ. ރައީސުލްޖުމްހޫރިއްޔާ ވިދާޅުވި ގޮތުގައި، މި އަޕްގްރޭޑް ކުރެވިފައިވާ ވެބްސައިޓަކީ ހެޔޮވެރިކަމާއި ޝަފާފިއްޔަތު އިތުރުކުރުމަށް ކުރެވިފައިވާ މުހިންމު ފިޔަވަޅެކެވެ. ވެބްސައިޓް ރަސްމީކޮށް ހުޅުއްވައިދެއްވީ ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް މިނިސްޓަރ އާދަމް ޝަރީފް ޢުމަރެވެ.
ކޮމެންޓު ފޮނުވާ