ޑިވެލޮޕްމަންޓް ބޭންކް ކުރީގެ ސީއީއޯ ޓްރައިބިއުނަލްއަށް ދިޔައީ ނޯޓިސް މުއްދަތުގެ މުސާރަ ނުލިބިގެން

ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް)ގެ ކުރީގެ ސީއީއޯ ނޮއެލް ގްރެގާ ޕެޓަސަން ޖޯންސް، ނޯޓިސް މުއްދަތުގެ މުސާރަ ހޯދުމަށް ވަޒީފާއާ ބެހޭ ޓްރައިބިއުނަލަށް މައްސަލަ ހުށަހަޅާފައިވާކަން ލިބިފައިވާ މަޢުލޫމާތުން އެނގިއްޖެއެވެ.

މިދިޔަ އަހަރުގެ ނޮވެންބަރު 16 ގައި އިފްތިތާޙް ކުރެވުނު ޑީބީއެމް އަކީ ރާއްޖޭގައި އަލަށް ގާއިމްކުރެވުނު ޑިވެލޮޕްމަންޓް ބޭންކެވެ. ނަމަވެސް މިހާތަނަށް ވެސް އެ ބޭންކުގެ ޚިދުމަތްތައް ރަސްމީކޮށް ފަށާފައެއް ނުވެއެވެ.

ބޭންކުގެ ސީއީއޯގެ މަޤާމަށް ބޭރުގެ ތަޖުރިބާކާރެއް ކަމަށްވާ ނޮއެލް ގްރެގާ ޕެޓަސަން ޖޯންސް އައްޔަންކުރެވުނީ މިދިޔަ އަހަރުގެ އޮގަސްޓް 26 ގައެވެ. އެހެންނަމަވެސް، މާގިނަ ދުވަސްތަކެއް ނުވަނީސް، މި އަހަރުގެ މާރިޗް 20 ގައި އޭނާ ވަނީ އެ މަޤާމުން އިސްތިޢުފާ ދީފައެވެ.

ޑީބީއެމް އިން މިއަދު ނެރުނު ބަޔާނެއްގައި ބުނެފައިވާ ގޮތުގައި، ޕެޓަސަން ޖޯންސް ހުށަހެޅުއްވި އިސްތިޢުފާ، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ ހަމަ އެ ދުވަހުން ފެށިގެން ބަލައިގެންފައެވެ. އަދި މިކަން، ޑީބީއެމްގެ ޑިރެކްޓަރުންގެ ބޯޑަށާއި ޕެޓަސަން ޖޯންސްއަށް މާރިޗް 23 ގައި އަންގާފައިވާކަމަށް ބޭންކުން ހާމަކޮށްފައިވެއެވެ.

"ޕެޓަސަން ޖޯންސް ވަނީ އިސްތިޢުފާ ދިނުމުގެ ކުޑަ ދުވަސްކޮޅެއް ކުރިން ދިވެހިރާއްޖެ ދޫކޮށް ވަޑައިގެންފައެވެ. އަދި އިސްތިޢުފާ ހުށަހެޅުމަށްފަހު މި ބޭންކުގައި އެއްވެސް ދައުރެއް އަދާކޮށްފައެއް ނުވެއެވެ" ބަޔާނުގައި މިހެން ބުނެފައިވެއެވެ.

މައުލޫމާތު ލިބިފައިވާ ގޮތުގައި، ޕެޓަސަން ޖޯންސް އިސްތިޢުފާ ދެއްވީ ނޯޓިސް މުއްދަތެއް ދެއްވުމަށްފަހުއެވެ. ނަމަވެސް އިސްތިޢުފާ ދިން ދުވަހުން ފެށިގެން ޕީސީބީން އިސްތިޢުފާ ބަލައިގެންފައިވުމާއެކު، ނޯޓިސް މުއްދަތުގެ މުސާރަ ދޭންޖެހޭތޯ ނުވަތަ ނޫންތޯ ކަނޑައެޅުމުގެ މަސައްކަތް ބޭންކުގެ ޤާނޫނީ ވަކީލުން އަންނަނީ ކުރަމުންނެވެ.

މުސާރައާއި އިނާޔަތްތައް ނުލިބުމާ ގުޅިގެން، ޕެޓަސަން ޖޯންސް އޭޕްރީލް 7 ގައި ވަޒީފާއާ ބެހޭ ޓްރައިބިއުނަލަށް މައްސަލަ ހުށަހެޅުއްވިއެވެ. ނަމަވެސް އޭނާއަކީ ދިވެހިބަހުން ވާހަކަދައްކަން އެނގޭ މީހަކަށް ނުވުމާއެކު، ތަރުޖަމާނަކު އައްޔަންކުރަން ދިން ފުރުސަތުގައި ތަރުޖަމާނަކު އައްޔަންކޮށްފައިނުވާތީ، ޓްރައިބިއުނަލުން ވަނީ މި މަހުގެ 7 ވަނަ ދުވަހު މި މައްސަލަ ބާޠިލުކޮށްފައެވެ.

ޓްރައިބިއުނަލްގެ ޤަވާއިދުގެ ދަށުން، ބާޠިލުކުރި މައްސަލަ 30 ދުވަހުގެ ތެރޭގައި 500 ރުފިޔާގެ ޖޫރިމަނާއަކާއެކު އަލުން ހުށަހެޅުމުގެ ފުރުޞަތު އޮވެއެވެ.

ޑީބީއެމްގެ ސީއީއޯ އިސްތިޢުފާ ދެއްވުމާ ގުޅިގެން، އައު ސީއީއޯއަކާއި މެނޭޖިންގ ޑިރެކްޓަރެއް އައްޔަންކުރުމުގެ މަސައްކަތް ކުރަމުންދާކަމަށް ބޭންކުން ބުނެފައިވެއެވެ. ރާއްޖޭގެ ފުރަތަމަ ޑިވެލޮޕްމަންޓް ބޭންކުގެ ޚިދުމަތްތައް ނުފެށި ލަސްވަމުންދާތީ ބައެއް ފަރާތްތަކުން ކަންބޮޑުވުން ފާޅުކޮށްފައިވީނަމަވެސް، ބޭންކުގެ މަސައްކަތްތައް ތާވަލާ އެއްގޮތަށް ކުރިއަށްދާކަމަށް މިނިސްޓަރ މުޙައްމަދު ސަޢީދު ކުރިން ވިދާޅުވެފައިވެއެވެ.