މޯލްޑިވްސް ޑިވެލޮޕްމަންޓް ބޭންކް (ޑީބީއެމް)ގެ ކުރީގެ ސީއީއޯ އަދި މެނޭޖިން ޑިރެކްޓަރު ނޮއެލް ގްރެގާ ޕެޓަސަން ޖޯންސްއަށް މަގާމުން ވަކިވުމާ ހަމައަށް މުސާރަ ދީފައިވާކަމަށް ޑީބީއެމުން މިއަދު ހާމަކޮށްފިއެވެ.
ނޮއެލް ގްރެގާ އިސްތިއުފާދިނުމާ ހަމައަށް މުސާރަ ނުދޭކަމަށް ބުނެ ވަޒީފާއާ ބެހޭ ޓްރައިބިއުނަލަށް މައްސަލަ ހުށަހެޅުމާ ގުޅިގެން ޑީބީއެމްއިން މިކަން ހާމަކޮށްފައިވަނީ ޚާއްސަ ނޫސްބަޔާނެއްގައެވެ.
ނޫސްބަޔާނުގައި ދީފައިވާ މަޢުލޫމާތަށް ބަލާއިރު، ޑީބީއެމްގެ ކުރީގެ ސީއީއޯ، މި އަހަރުގެ މާރިޗު 20 ވަނަ ދުވަހު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑަށް އިސްތިއުފާ ހުށަހަޅުއްވާފައިވެއެވެ. މި އިސްތިއުފާ ބޯޑުން ބަލައިގަތުމަށްފަހު އެ މަހުގެ 23 ވަނަ ދުވަހު ޑީބީއެމްއަށް އަންގާފައިވާކަމަށް ޑީބީއެމުން ބުނެފައިވެއެވެ.
"ކުރީގެ ސީއީއޯ މަޤާމުން ވަކިވުމާ ހަމައަށް އޭނާއަށް ހައްޤުވާ މުސާރަ ފުރިހަމައަށް ދީފައިވާނެ" ކަމަށް ޑީބީއެމްގެ ނޫސްބަޔާނުގައި ބަޔާންކޮށްފައިވެއެވެ.
ނޮއެލް ގްރެގާއަކީ އިނގިރޭސިވިލާތުގެ ރައްޔިތެއް ކަމަށްވާއިރު، އޭނާ ހުށަހެޅި މައްސަލައިގެ ތަފްސީލްތަކާ ބެހޭގޮތުން މި ވަގުތު އިތުރު މަޢުލޫމާތެއް ލިބިފައެއް ނުވެއެވެ.
ކޮމެންޓު ފޮނުވާ