ޕަންޖާބު، އިންޑިއާ – އިންޑިއާގެ އުތުރުގައި ހިމެނޭ ޕަންޖާބު ސްޓޭޓްގައި ވިހަ ބަނގުރާ ބުއި 27 މީހުން މަރުވެއްޖެއެވެ. މިމީހުން މަރުވީ މިދިޔަ ހަފުތާގެ ހޯމަ ދުވަހު އަމްރިޓްސާ ސަރަޙައްދުގައި ވިއްކި ކަމަށް ބެލެވޭ، ކައްކާފައިވާ ބަނގުރާ ބުއިމުގެ ސަބަބުންނެވެ.
ޕަންޖާބު ފުލުހުންގެ ތަޙުޤީޤަށް ހާމަވެފައިވާ ގޮތުގައި، އަގުހެޔޮކޮށް މާރުކޭޓަށް ނެރެފައިވާ މިބަނގުރާ އެތައް ބަޔަކު ގަނެގެން ބޭނުންކޮށްފައިވާއިރު، އެ ބަނގުރާ ތައްޔާރުކުރުމުގައި ބޭނުންކޮށްފައިވާ އާލާތްތަކުގެ ސަބަބުން އޭގައި ނުރައްކާތެރި ކެމިކަލް މާއްދާއެއް އުފެދި، އެއީ ބަނގުރާ ބުއި ފަރާތްތަކަށް ސިއްޙީގޮތުން ނުރައްކާތެރި ހާލަތެއް ކުރިމަތިކުރުވި ސަބަބު ކަމަށް ފުލުހުން ފާހަގަކޮށްފައި ވެއެވެ.
މި މައްސަލައާ ގުޅިގެން ހޮސްޕިޓަލުތަކަށް އަވަސް ފަރުވާ ހޯދުމަށް ގެންދެވުނު ގިނަ ފަރާތްތަކެއްގެ ހާލަތު ވަނީ ސީރިއަސްވެފައެވެ. ޕަންޖާބު ފުލުހުން މިހާތަނަށް 20 މީހަކު ވަނީ ހައްޔަރުކޮށްފައެވެ. އޭގެ ތެރޭގައި މި އޮޕަރޭޝަންގެ މައިގަނޑު އަމަލީ ފަރާތާއި، ސަރުކާރު އިދާރާތަކާ ގުޅުންހުރި 4 މީހުންވެސް ހިމެނެއެވެ.
ޕަންޖާބު ސަރުކާރުން ވަނީ މި ހިތާމަވެރި ހާދިސާގައި މަރުވެފައިވާ ކޮންމެ މީހެއްގެ އާއިލާއަށް އެއް މިލިއަން ރުޕީސް (ގާތްގަނޑަކަށް 158,000 ރުފިޔާ) ގެ ބަދަލު ދިނުމަށް ނިންމާފައެވެ. މީގެ އިތުރުން ސަރުކާރުން މިފަދަ ޤާނޫނާ ޚިލާފު ކަންކަން ހުއްޓުވުމަށް އިތުރު ފިޔަވަޅުތައް އަޅާނެކަމަށްވެސް ވަނީ އިޢުލާނުކޮށްފައެވެ.
ފުލުހުން މިމައްސަލަ ތަޙުޤީޤުކުރަމުންދާއިރު، ޕަންޖާބުގެ ލޯ އެންފޯސްމަންޓް އިދާރާތަކުން ވަނީ އެސަރަޙައްދުގައި އިތުރު މިފަދަ ބަނގުރާ ނުވިއްކޭނެ ގޮތަށް ސަލާމަތީ ފިޔަވަޅުތައް ހަރުދަނާކޮށްފައެވެ.
ކޮމެންޓު ފޮނުވާ