ސުޕްރީމް ކޯޓުގެ ދެ ފަނޑިޔާރުން ކަމަށްވާ ޑރ. އަޒްމިރަލްދާ ޒާހިރާއި މަހާޒު އަލީ ވަކިކުރުމާ ގުޅޭ މައްސަލަ ދިރާސާކުރާ ޖުޑިޝަރީ ކޮމިޓީއަށް އަޒްމިރަލްދާ ހާޒިރުނު ކުރަން މިއަދު ނިންމައިފިއެވެ. މިއަދު ބޭއްވި ކޮމިޓީގެ ބައްދަލުވުމުގައި ކެންދޫ ދާއިރާގެ މެންބަރު މައުރޫފް ޒާކިރު ހުށަހެޅުއްވީ މި މައްސަލަ ދިރާސާކުރުމަށް ޖުޑީޝަލް ސާވިސް ކޮމިޝަން ހާޒިރުކުރުމަށެވެ. ނަމަވެސް އެ ހުށަހެޅުމަށް ވޯޓަށް އެހުމުން ފާހެއް ނުވިއެވެ.
ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވީ ފަނޑިޔާރުންނާ ގުޅޭ ގޮތުން ފޮނުވާފައިވާ މައްސަލައިގައި އިޖުރާއީ ކަމެއް ފާހަގަ ނުކުރެވޭތީ، މައްސަލަ ތަޅުމަށް ފޮނުވުމަށެވެ. ކޮމިޓީން މިގޮތަށް ނިންމާފައިވާއިރު މަޖިލީހަށް ހާޒިރުވުމުގެ ފުރުސަތެއް ދެއްވުމަށް ދެ ފަނޑިޔާރުން ވެސް އެދިވަޑައިގެންފައިވެއެވެ.
ބާ ކައުންސިލުން މީގެ ކުރިން ނެރުނު ނޫސްބަޔާނެއްގައި ބުނެފައިވަނީ ޤާނޫނު އަސާސީގެ 154 ވަނަ މާއްދާގެ ދަށުން ފަނޑިޔާރުން ސުލޫކީ މިންގަނޑުތަކާއި އުސޫލުތަކުން ބޭރުނުވެ މަސައްކަތްކުރާހާ ހިނދަކު ވަކިކޮށްގެން ނުވާނެކަމަށެވެ. އަދި ޖޭއެސްސީން މި ދެ ފަނޑިޔާރުންގެ މައްސަލަ ތަޙުޤީޤުކުރުމުގައި އިޖުރާއީ އަދުލުވެރިކަން ޤާއިމުކޮށްދިނުމަށް އެދިފައިވެއެވެ.
ސުޕްރީމް ކޯޓުގެ މި ދެ ފަނޑިޔާރުން ވަކިކުރުމަށް ޖޭއެސްސީން ނިންމާފައިވަނީ ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވުމުގެ މައްސަލައަކާ ގުޅިގެންނެވެ. އަދި މި މައްސަލަ ބަލަމުން ގެންދަނީ އޭސީސީ އިންނެވެ. މި ދެ ފަނޑިޔާރުން ސަސްޕެންޑް ކޮށްފައިވާތާ މިހާރު ވަނީ ދެ މަސް ދުވަސް ވެފައެވެ.
ކޮމެންޓު ފޮނުވާ