ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރުގެ ފިރިކަލުން ޑރ. އިސްމާޢީލް ލަތީފު މަސާޖު ޕާލާއަކުން ހައްޔަރުކުރެވުނީ ބަރަހަނާ ހާލުގައިކަމަށް ޖުޑީޝަލް ސާވިސް ކޮމިޝަން (ޖޭއެސްސީ)ގެ ތަހުގީގު ރިޕޯޓުގައި ބަޔާންކޮށްފައިވާ ވާހަކައަކީ ކަނޑައެޅިގެން ދޮގެއްކަމަށް އަޒްމިރަލްދާގެ ވަކީލު އިބްރާހިމް ޝަމީލް މިއަދު ވިދާޅުވެއްޖެއެވެ.
ޝަމީލް ވިދާޅުވީ ލަތީފް އެ ސްޕާއަށް ފުލުހުން ވަތްއިރު، ފުލުހުންގެ ބޮޑީ ކެމެރާގެ ފުޓޭޖުން ވެސް އެނގޭ ގޮތުގައި އޭނާ އޮންނެވީ ބަރަހަނާ ހާލުގައި ނޫންކަމަށެވެ. އަދި ޖޭއެސްސީން މި މައުލޫމާތު ރިޕޯޓަށް އިތުރުކޮށްފައިވަނީ ފަހުން ކަމުގައި ފާހަގަކުރެއްވިއެވެ.
"ޑރ. އިސްމާއީލް ލަތީފު އޮތީ ބަރަހަނާ ހާލަތުގައި ކަމަށް ޖުޑީޝަލް ސާވިސް ކޮމިޝަނުގެ ރިޕޯޓުގައި ބަޔާންކުރައްވައިފައި އޮތް އޮތުމަކީ ކަނޑައެޅިގެން ހަގީގަތާ ޚިލާފު ވާހަކައެއް" ޝަމީލް ވިދާޅުވިއެވެ.
ޝަމީލް ފާހަގަކުރެއްވި ގޮތުގައި އެ ރޭ ފުލުހުން ހިންގި އޮޕަރޭޝަނުގައި އެހެން ކޮޓަރިއަކުން ބަރަހަނާކޮށް ތިބި އަންހެނަކާއި ފިރިހެނަކު ހައްޔަރުކުރިއިރު، އަންހެން މީހާއަށް ހަށިވިއްކުމުގެ ދައުވާ އުފުލާފައިވާއިރު ލަތީފުގެ މައްޗަށް ދައުވާއެއް އުފުލާފައިނުވުމުން ވެސް ހާމަވަނީ އޭނާ ގޯހެއް ކޮށްފައި ނުވާކަމެވެ.
މިދިޔަ ފެބްރުވަރީ 26ގައި އަޒްމިރަލްދާ ސަސްޕެންޑުކޮށް، މިދިޔަ އާދިއްތަ ދުވަހު މަގާމުން ވަކިކުރަން ނިންމީ މިދިޔަ ޑިސެމްބަރު 4ގައި ލަތީފު ހައްޔަރުކޮށްގެން ކްރިމިނަލް ކޯޓަށް ގެންދިޔުމުން، އޭނާ މިނިވަންކުރުމަށް ނުފޫޒު ފޯރުވި ކަމަށް ތުހުމަތުކޮށެވެ.
ޝަމީލް ވިދާޅުވީ ލަތީފު ބަންދުން ދޫކޮށްލިއިރު ގާނޫނާ އެއްގޮތަށްކަން ހިންމަވަނީ ފުލުހުން އެ ނިންމުން އިސްތިއުނާފުކުރަން އެދިފައިނުވުމުންނެވެ. އަދި ކްރިމިނަލް ކޯޓުގެ ގާޒީ ޒިހުނީގެ ބަޔާނުން ހާމަވަނީ ލަތީފް ބަންދުން ދޫކޮށްލި ފަހުން ކަމަށް އޭނާ ވިދާޅުވިއެވެ.
"ހެއްކެއް ގަރީނާއެއް މިކަމުގައި ނެތް ކަމެއްގައި ނުވެސް ހިނގާ ކަމެއްގައި މިއޮތީ ފަނޑިޔާރުގެ މައްޗަށް ހަދަހަދައިގެން ދޮގު ތުހުމަތެއް [ޖޭއެސްސީން] ކުރައްވައިފައި، ފަނޑިޔާރު، ފަނޑިޔާރުކަމުގެ މަގާމުން ވަކިކުރަން. މިއީ ކަނޑައެޅިގެން ބޭއިންސާފެއް" ޝަމީލް ވިދާޅުވިއެވެ.
ޖޭއެސްސީން މި މައްސަލައިގައި ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރަށް ވެސް، ކްރިމިނަލް ކޯޓަށް ނުފޫޒު ފޯރުވަން އުޅުނު ކަމުގެ ތުހުމަތުކޮށް، މަގާމުން ވަކިކުރަން ވަނީ ނިންމާފައެވެ.
ޖޭއެސްސީގައި އަޒްމިރަލްދާގެ ތަހުގީގު ކުރިއަށް ދިޔައިރު އެ މައްސަލަ ބަލާ ކޮމިޓީގެ ބައްދަލުވުންތައް އާންމުކޮށް ހުޅުވައިލުމަށާއި ނިންމުމެއް ނިންމުމުގެ ކުރިން ފުރުސަތަކަށް އަޒްމިރަލްދާ އެދިވަޑައިގެންފައިވާއިރު، އެ ކަންކަމަށް ފުރުސަތު ދީފައިނުވެއެވެ. ޝަމީލްގެ އުންމީދަކީ މަޖިލީހުގެ ކޮމިޓީގައި އަޒްމިރަލްދާއަށް ޝަކުވާތައް އިއްވަން ފުރުސަތު ލިބުމެވެ.
ކޮމެންޓު ފޮނުވާ