ސުޕްރީމް ކޯޓުގެ ދެ ފަނޑިޔާރުން ކަމަށްވާ ޑރ. އަޒްމިރަލްދާ ޒާހިރާއި މަހާޒު އަލީ ޒާހިރު މަގާމުން ވަކިކުރަން ޖުޑީޝަލް ސާވިސް ކޮމިޝަން (ޖޭއެސްސީ)އިން މިއަދު ނިންމައިފިއެވެ.
މި ދެ ފަނޑިޔާރުންނާއި ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު ސަސްޕެންޑު ކުރީ މިދިޔަ ފެބްރުއަރީ މަހުގެ 26ވަނަ ދުވަހު، ސުލޫކީ މައްސަލައެއް ބަލާކަމަށް ބުނެއެވެ. ނަމަވެސް ހުސްނުއްސުއޫދު ވަނީ މާޗު މަހުގެ 4 ވަނަ ދުވަހު އިސްތިއުފާ ދެއްވައިފައެވެ.
ޖޭއެސްސީގެ ތަހުގީގު ކޮމިޓީން މިދިޔަ މަހުގެ 17ވަނަ ދުވަހު ތަހުގީގު ނިންމައި ފޮނުވި ރިޕޯޓުގައި ބުނެފައިވަނީ، އަޒްމިރަލްދާ އެ ކޯޓުގެ އެހެން ފަނޑިޔާރަކާ ބައިވެރިވެގެން ކްރިމިނަލް ކޯޓުގެ ފަނޑިޔާރުންތަކަކަށް ގުޅައި ނުފޫޒު ފޯރުވި ކަމަށެވެ. މި މައްސަލައިގައި މަހާޒް އަލީ ޒާހިރަށް ވެސް ތުހުމަތު ކުރެއެވެ.
އަޒްމިރަލްދާގެ ގާނޫނީ ވަކީލު ޝަމީލް މީގެ ކުރިން ވާހަކަދައްކަވަމުން ވިދާޅުވީ ކޮމިޓީން މައްސަލަ ބަލައި ނިންމީ ހަގީގަތާ ޚިލާފަށް ކަމަށެވެ. އަދި މައްސަލަ ބެލި ކޮމިޓީގައި ރައީސް އައްޔަންކުރައްވާ ދެ ބޭފުޅުން ތިއްބެވި ކަމަށް ވެސް ވަކީލު ފާހަގަކުރައްވައިފިއެވެ.
ޖޭއެސްސީގެ މިއަދުގެ ޖަލްސާގައި ކޮމިޓީގެ ރިޕޯޓާ އެއްގޮތަށް ދެ ފަނޑިޔާރުން ވަކިކުރުމަށް ފާސްކުރުމުން، މި މައްސަލަ ފޮނުވާނީ ރައްޔިތުންގެ މަޖިލީހަށެވެ. މަޖިލީހުގެ ޖުޑީޝަރީ ކޮމިޓީން، މައްސަލަ ބެލީ އިޖުރާއަތުތަކާ އެއްގޮތަށްތޯ ޔަގީންކުރާނެއެވެ.
ފަނޑިޔާރަކު ވަކިކުރެވޭނީ ރައްޔިތުންގެ މަޖިލީހުގެ ޖަލްސާއަށް ހާޒިރުވެ ވޯޓުގައި ބައިވެރިވާ މެންބަރުންގެ ތިންބައިކުޅަ ދެބައިގެ އަޣުލަބިއްޔަތުން ވަކިކުރަން ފާސްވުމުންނެވެ.
މި ފަނޑިޔާރުންގެ ސުލޫކީ މައްސަލަ ބަލަން ޖޭއެސްސީން ނިންމީ، މަޖިލިސް މެންބަރުން އިންތިޚާބުވި ޕާޓީން ވަކިވުމުންނާއި ވަކިކުރުމުން ވެސް ގޮނޑި ގެއްލޭ ގޮތަށް ގާނޫނުއަސާސީއަށް ގެނެސްފައިވާ އިސްލާހުގެ މައްސަލައެއް ބަލަމުން ދަނިކޮށެވެ.
ކޮމެންޓު ފޮނުވާ