ހިތަދޫ މެދު ދާއިރާގެ ޕީއެންސީ މެމްބަރު އަހުމަދު އަޒާން މިހާރު އެމަނިކުފާނާ ވާހަކަ ނުދައްކަވާ ކަމަށާއި، އެކަމާ ދޭތެރޭގައި ކަންބޮޑުވުން ފާޅުކުރައްވައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ އަޒާން އެމަނިކުފާނާ ވާހަކަ ނުދައްކަވާތާ ދުވަސްކޮޅެއް ވެފައިވާ ކަމަށެވެ. އަދި އަޒާން މެމްބަރު ކަމަށް އިންތިހާބުވީ ރައީސުލްޖުމްހޫރިއްޔާގެ އެހީތެރިކަމާއެކު ކަމަށް ވެސް ފާހަގަކުރެއްވިއެވެ.
"އަޅުގަނޑު އެހީވެގެން، އަޅުގަނޑު ސަޕޯޓު ދީގެން ޕީއެންސީގެ ޓީމު އެކުރި ހުރިހާ ކަމެއް ކޮށްދީގެން އަޒާން އެ މަގާމަށް އައިސްފައި އެހެރީ،" ރައީސް ވިދާޅުވިއެވެ. ނަމަވެސް އަޒާންއާ ޖެހުނު މައްސަލައެއްގެ ތަފްސީލު ރައީސް ހާމައެއް ނުކުރައްވައެވެ.
މި ބަޔާން އައިސްފައިވަނީ ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދުކުރަން ހުށަހެޅި ބިލަށް ތާއީދުކުރަން އަންގާފައި އޮއްވައި އެ ބިލަށް ވޯޓުނުދިން މައްސަލައިގައި ޕީއެންސީގެ މެންބަރުން ތިއްބަވާ ވަޓްސްއެޕް ގްރޫޕުން އަޒާން ބޭރުކުރިތާ މާ ގިނަ ދުވަސްތަކެއް ނުވަނީސްކަން ފާހަގަކުރެވެއެވެ.
އަޒާން ވަނީ މަޖިލީހުގެ މުހިންމު ދެ ކޮމިޓީ ކަމަށްވާ މާލިއްޔަތު ކޮމިޓީ އާއި ސަލާމަތީ ހިދުމަތްތަކާ ބެހޭ ކޮމިޓީ (241ކޮމިޓީ) އިން ވެސް ވަކިކުރެވިފައެވެ. މި ކޮމިޓީތަކުން އޭނާ ވަކިކުރީ އެ ކޮމިޓީތަކުން ސަރުކާރު ހިއްސާވާ ކުންފުނިތަކުގެ ހިޔާނާތްތައް ބަލަމުންދާތީ، ނުފޫޒު ގަދަ ބައެއްގެ ބާރުން ކަމަށް އަޒާން ވަނީ ތުހުމަތުކުރައްވާފައެވެ.
ކޮމެންޓު ފޮނުވާ